«Kóp keshikpeıtin kómek» atty qaıyrymdylyq jobasy bastalady
Búgin osyǵan oraı Ulttyq baspasóz ortalyǵynda baspasóz máslıhaty bolyp ótti, dep habarlaıdy QazAqparat.
«Astana qalasy múgedek-balalar qoǵamy» birlestiginiń tóraıymy Qamqa Jasanovanyń aıtýynsha, atalǵan jobanyń basty maqsaty qoǵamnyń nazaryn múgedek-balalardyń problemalaryna aýdarý, aqparattyq qoldaý arqyly jurtshylyqtyń qaıyrymdylyq sharaǵa qatysýyn belsendire túsý bolyp tabylady. Joba aıasynda jınaqtalǵan qarajattyń barlyǵy tserebraldy sal aýrýyna shaldyqqan balalarǵa, júrek aýrýy, onkologııalyq aýrýlar boıynsha kúrdeli ári qymbat operatsııa jasaýdy qajet etetin búldirshinderge baǵyttalatyn bolady.
Sonymen qatar, «Kóp keshikpeıtin kómek» jobasy aıasynda birqatar qaıyrymdylyq aktsııalary qamtylǵaly otyr. Atap aıtqanda, «Vester Gıper» dúkender jelisi boıynsha tutynýshylarǵa qaıyrymdylyq paketteri usynylyp, «Paket satyp al da - balalarǵa kómektes!» atty aktsııa josparlanyp otyr. Budan basqa, qonaq úı bıznesteri úshin aktsııalar «Dıplomat» qonaq úıinde uıymdastyrylsa, birqatar demalys oryndarynda qaıyrymdylyq oıyn-saýyq sharalary júzege asady. Sonyń aıasynda aýyr naýqastanǵan balalar úshin qarajat jınaý kútiledi.
Uıymdastyrýshylardyń sózine qaraǵanda, aýyr naýqasty balalardy emdeýge Qytaı Halyq Respýblıkasynyń medıtsına mamandary da atsalysatyn kórinedi. «Osy joba aıasynda qytaılyq táýipterdiń balalarǵa arnalǵan em-domy ádettegi kúnge qaraǵanda birshama arzanyraq bolǵaly otyr» deıdi uıymdastyrýshylar.
Joba jalpyqalalyq «Úmit kúni» atty aktsııamen birge qarashanyń 21-inen bastalady. Qaıyrymdylyq jobasyna qatysqysy keletinderge 62-75-00 telefony arqyly qońyraý shalyp, habarlasýyna bolady.