Kóp aýylda turǵyndar qarapaıym medıtsınalyq kómekke muqtaj - dáriger

NUR-SULTAN. QazAqparat - Memleket basshysy Qasym-Jomart Toqaev óz Joldaýynda medıtsınanyń damýyna tyń serpin beriletinin atap ótti. Ásirese, aýyldyq eldi mekenderdegi tıimdi densaýlyq saqtaý júıesin jetildirýge 3 jyldaı ýaqyt qajet dedi. Shyn máninde, bul - ıgi bastama, deıdi dáriger Mahmýd Esengeldıev.

«Memleketimizdiń qundylyǵy – halyq desek, halyq úshin bastysy – densaýlyq. Eldi mekenderdegi halyq densaýlyǵy, ásirese, ózekti. Muny men dáriger retinde ǵana emes, aýylda týyp-ósken, eńbek etip júrgen azamat retinde aıtyp otyrmyn. Kópshilik aýyldardaǵy turǵyndar qarapaıym medıtsınalyq kómekke muqtaj. Onyń ústine, dárihanalardyń joqtyǵy qınaltady. Meniń dáriger retindegi armanym - eldi mekende kabınet ashý bolatyn. Osydan 4-5 jyl buryn sol armanǵa qol jetkizip, Qyzylorda oblysy, Mahambet aýylynan kishkene ǵana klınıka men dárihana ashtyq. Ótkende ǵana koronovırýs pandemııasynyń ýshyǵyp turǵan kezinde qanshama aýyl adamy dári izdep sharlap ketti. Sol kezde halyq úshin dárihananyń qajettiligine taǵy bir kóz jetkizdim» deıdi dáriger.

Prezıdent alys eldi mekenderde kóliktik medıtsınany jańǵyrtýdy qolǵa alýdy atap ótti. Mamannyń sózine sensek, buryndary ol sala jaqsy damyǵan edi. Qazir qaıta jańǵyrtar bolsa nur ústine nur bolady.

«Jalpy, memleketimizdegi bıliktiń halyqtyń muń-muqtajyn tyńdap, zaman aǵymyna sáıkes ózgere bilýi qýantady. Qazirgi respýblıka deńgeıinde densaýlyq saqtaý júıesiniń máz emes ekeni barshaǵa málim. Ásirese, materıaldy-tehnıkalyq bazanyń jetkiliksizdigi, bilikti mamandardyń azdyǵy, medıtsınalyq qyzmet sapasynyń tómendigi, al eń bastysy dárigerlerdiń aılyǵynyń azdyǵy medıtsına salasyna jańa kadrlardyń barýyna kedergi. Mysaly, AQSh medıtsına salasyna jylyna jalpy ishki óniminiń (VVP) 16,4 paıyzyn jumsaıdy eken, al, Shveıtsarııa - 12,1%. Bizdiń elimizde bul kórsetkish - 3,4% shamasynda. Jalpy, kez kelgen eldiń densaýlyq saqtaý júıesin sol eldegi adam ómiriniń uzaqtyǵymen ólsheıdi. Ádette. Bul jaǵynan kelgende Qazaqstan jaǵdaıy máz emes. Adam ómiriniń uzaqtyǵy boıynsha Qazaqstan álemde 111 orynda. Buǵan adamǵa der kezinde shuǵyl kómek berý, emniń kóptegen túrlerin jergilikti jerlerde kórsetý, taǵy basqa faktorlar áser eteri sózsiz» dep atap ótti Mahmýd Esengeldıev.

Dárigerdiń aıtýynsha, halyqtyń da ómir súrý saltyna ózgeris engizý qajet. Salaýatty ómir salty, taza aýa, dene shynyqtyrý, durys tamaqtaný degen sııaqty.

«Memleket medıtsına salasynyń ınfraqurylymyn damytýǵa, osy salaǵa mán berýdi qolǵa aldy. Endeshe, biz de óz tarapymyzdan barynsha qoldan kelgendi aıamaıtyn bolamyz» dep túıindedi sózin dáriger.