Kontsert, oıyn-saýyq: Astana turǵyndaryn 28 jeltoqsan kúni ne kútip tur

<p>ASTANA. KAZINFORM&nbsp;&mdash; Elorda ákimdigi jańa jyldyq kóńil-kúıge bólenip, qysqy demalysty qaı jerde kóńildi ótkizýge bolatyny týraly habarlady.</p>

Elordanyń ár jerinde syrǵanaqtar, muz aıdyndary, bezendirilgen shyrshalar, jańa jyldyq jármeńkeler, shaǵyn arhıtektýralyq formalar, kontserttik baǵdarlamalar, fotoaımaqtar jáne t. b. turǵyndardyń qýanyshyna aınalady. 

28 jeltoqsanda Astananyń bes negizgi ornynda qazaq estradasynyń juldyzdary men shyǵarmashylyq toptarynyń qatysýymen merekelik baǵdarlamalar, jańa jyldyq syılyqtary bar ınteraktıvti jáne sporttyq oıyndar, balalarǵa arnalǵan baǵdarlama, sport mektepteri oqýshylarynyń qoıylymdary jáne taǵy basqalar ótedi.

Osylaısha, Nura aýdanyndaǵy «Astana Arena» stadıonynyń avtoturaǵynda merekelik kóńildi kesh 12.00-de bastalyp, 21.00-ge deıin jalǵasady. Jurtshylyq arqan tartys, qappen júgirý, konkı tebý, mánerlep syrǵanaýdan master klass, júldeli estafetalar jáne kontserttik baǵdarlamamen birge kóńildi starttardy tamashalaı alady.

Foto: Astana ákimdigi

Esil aýdanynyń EKSPO aýmaǵynda saǵat 16.00-den 18.00-ge deıin merekelik baǵdarlama ótip, kórermenderge shaıbaly hokkeıden sheberlik synyby, júldeli sporttyq estafetalar men kontserttik baǵdarlama usynylady.

Foto: Astana ákimdigi

Saraıshyq aýdanyndaǵy «Qazaq eli» monýmenti janyndaǵy alańda merekelik kóńildi kesh saǵat 14.00-de bastalady. Іs-shara qonaqtary kóńildi starttarǵa qatysyp, júldeler utyp ala alady, estrada juldyzdary men shyǵarmashylyq ujymdardyń qatysýymen kontserttik baǵdarlama saǵat 18.00-den 20.00-ge deıin ótedi.

Foto: Astana ákimdigi

Saryarqa aýdanyndaǵy qalalyq alańda (elorda ákimdiginiń aldynda) jańa jyldyq baǵdarlama saǵat 12.00-den 14.00-ge deıin ótedi. Qala qonaqtary men turǵyndary úshin shaıbaly hokkeıden sheberlik synyby men kontserttik baǵdarlama uıymdastyrylady.

Foto: Astana ákimdigi

Almaty aýdanynyń Táýelsizdik dańǵyly boıyndaǵy Oqýshylar saraıynyń aýmaǵynda saǵat 12.00-13.00 aralyǵynda balalar shyǵarmashylyq ujymdarynyń qatysýymen kontserttik baǵdarlama ótedi.

Foto: Astana ákimdigi

Esterińizge sala keteıik, atalmysh oryndarda jańa jyldyq jármeńkeler, syrǵanaqtar, muz aıdyny jáne t. b. jumys isteıdi.

Buǵan deıin habarlaǵanymyzdaı, elorda polıtsııasy jańa jylda aıaz ata, aqshaqar shaqyrǵanda saq bolýdy eskertti.