Kontrafaktilik ónimderge qatysty Qazaqstanda 600-den astam qylmys anyqtaldy - B. Saǵyntaev
Bul týraly búgin VII AEF aıasynda ótkizilgen «Antıkontrafakt» II halyqaralyq forýmynda QR Premer-Mınıstriniń birinshi orynbasary Baqytjan Saǵyntaev málim etti.
Onyń aıtýynsha, kontrafaktilik ónimderden quqyq ıeleri men óndirýshiler ǵana emes, tutynýshylar japa shegip otyr. «Kontrafaktilik ónimderdiń aınalymy jahandyq sıpatqa ıe. AESR esebi boıynsha 2011 jyly ótkizilgen kontrafaktilik taýarlardan 285,360 mlrd. dollar kiris túsken. Osynyń sebebinen álemdik naryq jyl saıyn 650 mlrd. dollar qarajat joǵaltady», - dep atap ótti ol.
Taqyrypqa baılanysty birinshi vıtse-premer Qazaqstandaǵy ahýalǵa da toqtaldy. «2013 jyly Qazaqstanda Qarjy polıtsııasy kontrafaktilik ónimderge qatysty 600-den astam qylmysty anyqtady. Shamamen 70-ke taıaý zańsyz tseh áshkerelendi. Bul 2012 jylmen salystyrǵanda 2 esege kóp», - dedi ol.