Konstıtýtsııalyq sot «Jerdiń asty men ústi halyq ıgiligi» ekeni týraly baptyń mánin túsindirýden bas tartty
Konstıtýtsııanyń 6-babynyń 3-tarmaǵynda Qazaqstan jeriniń ústi men asty halyqtyń ıgiligi ekenin aıtylǵan. Osy bapty alǵa tartqan sarapshylar men keıbir depýtattar Úkimetti Qazaqstan aýmaǵynda jumys istep júrgen iri jer qoınaýyn ıgerýshilermen jasalǵan kelisimshart mátinin kópshilikke jarııalaýǵa úndep júr. Konstıtýtsııalyq sottan osy talaptyń qanshalyqty oryndy ekenin surap, saýal joldaǵan edik.
«Joldanymda Siz «Konstıtýtsııanyń 6-babynyń 3-tarmaǵy memlekettik organdardy jer qoınaýyn ıgerýshilermen jasalǵan kelisimsharttardy jalpyǵa qoljetimdi etip jarııalaýǵa mindetteıtini nemese mindettemeıtini jóninde jaýap berýdi suraýdasyz. Bul rette, Qazaqstan Respýbıkasy Konstıtýtsııasynyń 72-baby 1-tarmaǵynyń 4)-tarmaqshasyna sáıkes Konstıtýtsııanyń normalaryna resmı túsindirmeni Konstıtýtsııalyq Sot Qazaqstan Respýblıkasy Prezıdentiniń, Senat Tóraǵasynyń, Májilis Tóraǵasynyń, Parlament depýtattary jalpy sanynyń keminde besten bir bóliginiń, Premer-Mınıstrdiń ótinishi boıynsha ǵana beredi», - dep jazylǵan jaýapta.
Resmı jaýapta qarapaıym azamattar Konstıtýtsııalyq sotqa tikeleı ózine qatysty máseleler boıynsha, onyń ózinde ózge zańnama qujattarynyń Konstıtýtsııaǵa sáıkestigi boıynsha ǵana suraý sala alatyny aıtylǵan. Al Konstıtýtsııanyń normalary boıynsha Konstıtýtsııalyq sotqa óz betimen júgine almaıdy. Keminde Parlament depýtattarynyń 5-ten bir bóliginiń qoly jınalǵan saýal joldaý qajet.
«Konstıtýtsııalyq Sot azamattardyń ótinishterine olardyń Konstıtýtsııada bekitilgen quqyqtary men bostandyqtaryn tikeleı qozǵaıtyn normatıvtik quqyqtyq aktileriniń Respýblıka Konstıtýtsııasyna sáıkestigin qaraıdy (Konstıtýtsııanyń 72-baby 3-tarmaǵy). Azamattardyń Konstıtýtsııalyq Sotqa júginý tártibi men sharttary Konstıtýtsııalyq zańnyń 44, 45-baptarynda naqtylanǵan. Ótinishińiz atalǵan sharttar men talaptarǵa sáıkes kelmeıdi», - delingen jaýapta.