Konstıtýtsııalyq sot qurylǵannan beri qansha ótinishpen jumys istedi

<p>Konstıtýtsııalyq sot tóarǵasy Elvıra Ázimova bir jyl ishinde qazaqstandyqtardan qansha ótinish túsip, onyń qanshasy óndiriske alynǵanyn aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Konstıtýtsııalyq sot qurylǵan bir jylǵa jýyq ýaqyttyń ishinde azamattar jıi júginip jatyr dep aıtýǵa bolady. Júginýshilerdiń bári quqyqtary buzylý faktileri boıynsha shaǵymdanady. Onyń bir bóligi taptalǵan quqyǵyn qalpyna keltirýdi surasa, taǵy bir bóligi ótep berýdi talap etedi. Sondaı-aq, azamattar áli iske aspaǵan, biraq qabyldanýy yqtımal sheshimderge qarsylyq bildirip júginedi. Bul shaǵymdar qabyldanatyn sheshimniń yqtımal saldarynyń aldyn alý úshin jasalady. Keıde bastamalardy durys túsinbegende, halyqqa tıisti aqparat jetkilikti mólsherde berilmegen kezde osyndaı qarsylyqtar bildirip jatady. Bizdiń zańnamada quqyqtyq-normatıvtik aktilerdi qabyldamaı turyp qoǵam talqylaýyna usyný kerek. Osy talqylaýlar negizinde túsetin shaǵymdar da bar», — deıdi Elvıra Ázimova «Adam quqyqtaryn qamtamasyz etetin halyqaralyq quqyqtyq normalardy ulttyq zańnamaǵa ımplementatsııalaý» atty halyqaralyq ǵylymı-praktıkalyq konferentsııada.

Konstıtýtsııalyq sot tóraıymy organ qurylǵannan beri 5 myńǵa jýyq ótinish túskenin aıtady.

«5 myńǵa jýyq ótinishtiń ishinde 27 paıyzdan astamy Konstıtýtsııalyq sottyń óndirisine alynyp, naqty sheshimder shyǵaryldy. Keshe ǵana № 36, 37 sheshimderdi shyǵardyq. Ol sheshimderde Úkimet pen Joǵary sotqa densaýlyq qorǵaý salasyndaǵy adam quqyqtarymen baılanysty, sýdıalardyń kásiptik quqyǵymen baılanysty aktilerdi qaıta qarap, zańnamalyq usynystar engizý týraly usynym berdik. Demek, túrli oqıǵalarmen, túrli sáttermen baılanysty ótinishter túsedi. Bizge túsken 5 myń ótinishtiń qalǵan 73 paıyzy nazardan tys qalmaıdy. Konstıtýtsııalyq sot apparaty ol ótinishter boıynsha túsindirme beredi», — dedi ol.