Konstıtýtsııanyń 44-babyna ózgeris ense, ákimderdiń halyqpen baılanysy artady - sarapshy
Sarap eksperttik klýbynyń konstıtýtsııalyq reforma taqybyryna arnalǵan otyrysynda Gamal Túzelbaev Konstıtýtsııany qaıta jazyp shyǵýmen jumys bitpeıtinin aıtty.
«Ádemi, saýatty Konstıtýtsııa jazýmen jumys bitpeıdi. Jazylǵannyń bárin ispen júzege asyrý kerek bolady. Osy turǵydan alsaq, azamattyq qoǵam men onyń belsendiligi mańyzdy ról atqarady. Qoǵamdyq baqylaý men onyń qolyndaǵy qatysý tetikterin tıimdi paıdalaný da mańyzǵa ıe. Bul jerde qoǵamdyq keńesterge jiti nazar aýdarýdy usynar edim. Qazir bul keńester memlekettik sheshimder qabyldaýǵa azamattardy tartatyn negizgi quraldardyń biri bolyp otyr.
Men baıqaǵan zańnamalyq ózgerister boıynsha, memlekettik organdar sheshimdi qoǵam pikirin eskere otyryp qabyldaýy kerek. Osy baǵytta Konstıtýtsııanyń 44-babyna ózgeris engizilmekshi. ıAǵnı, Prezıdenttiń oblystardyń jáne respýblıkalyq mańyzdaǵy qala ákimderiniń aktilerin qabyldamaı tastaý ókileti joıylady. Bul aqylǵa qonymdy. Óıtkeni ákimder jergilikti qoǵamnyń pikirin eskerip sheshim qabyldaýy kerek», - dedi sarapshy.
Sondaı-aq, ol ár ákimniń qaramaǵyndaǵy óńirdiń áleýmettik-eonomıkalyq damý, ahýaly úshin jaýapkershiligi bar ekenin eske saldy.
«Ákim sheshim qabyldaý kezinde zańdy buzǵan bolsa nemese basqa da quqyqtyq qatelik jiberse, ony jazalaý sottardyń jumysy bolý kerek dep oılaımyn.
Ózgerister jobasynda Esep komıtetin Joǵary aýdıtorlyq palata etip qurylymdaý kózdelgen. Ol jylyna 2 ret Májilistiń aldynda esep beredi. Bul da jaqsy. Olar da úkimettik emes uıymdarmen ózara baılanysty jaqsartsa eken degen tilek bar.
Ózgerister jobasynda azamattardyń kúdigin týyndatatyn usynystar da bar. Mysaly, Úkimet óz jaýapkershiligimen normatıvtik-quqyqtyq aktiler qurýǵa ókiletti bolýy múmkin. Ol aktiniń Parlament qabyldap nemese keri qaıyrǵansha ýaqytsha bolsa da zańdyq kúshi bolady. Qańtar oqıǵasynan keıin halyqtyń Úkimetke degen senimin qalpyna keltirý kerek áli. Burynǵy Úkimettiń jibergen qatelikteri bar. Olardyń bárin túzetý kerek. Kóleńkeli ekonomıka, taýar baǵasyn qalyptastyrýdyń túsiniksiz joldary bar degen sııaqty. Halyqtyń baspana alýy problemaǵa aınalyp tur. Kiris bir ornynda, al baǵalar ósip jatyr. Osyndaı máseleniń bárin sheshý kerek», - dedi qoǵamdyq qordyń tóraǵasy.
Buǵan deıin jazǵanymyzdaı, Qapshaǵaı qalasynyń atyn ózgertýge arnalǵan saltanatty is-sharaǵa qatysqan QR Parlamenti Senatynyń depýtattary Nurtóre Júsip pen Dınar Nóketaeva Qonaev qalasynyń turǵyndarymen aldaǵy referendým jóninde pikir almasty.