Konstıtýtsııalyq Sot qurylǵaly beri 2 myńnan astam ótinish tústi

ASTANA. QazAqparat - Konstıtýtsııalyq Sotqa bıylǵy 7 sáýirge deıin osy organǵa júginýge quqyǵy bar sýbektilerden 2179 ótinish tústi, dep habarlaıdy QazAqparat.

Vedomstvonyń málimetinshe, qazirgi ýaqytta 355 ótinish qaraýda. Konstıtýtsııalyq is júrgizýge 12 ótinish qabyldandy, taǵy 36 ótinishti sýdıalar aldyn ala zerdeleýde.

«Ótinish berýshiler negizinen sottardyń sheshimderimen kelispeý – 43%, normatıvtik quqyqtyq akti nemese onyń jekelegen erejelerin konstıtýtsııalyq emes dep taný – 21%, aqparatqa qol jetkizý – 3,6%, eńbek jáne zeınetaqymen qamsyzdandyrý – 2,3%, qylmystyq-atqarý júıesi – 1,3% jáne ózge de máseleler boıynsha jıi júgingeni kórinedi.

Osy aralyqta azamattardyń ótinishteri boıynsha tórt normatıvtik qaýly shyǵaryldy. Atap aıtqanda, Konstıtýtsııalyq Sot Salyq kodeksiniń, Qylmystyq-atqarý kodeksiniń, memlekettik qyzmet salasyndaǵy zańnamanyń jekelegen normalaryn Konstıtýtsııaǵa sáıkes emes dep tanydy. Sondaı-aq, zeınetaqymen qamsyzdandyrý týraly Zańnyń jekelegen normalaryn Konstıtýtsııalyq Sot bergen túsindirmede Konstıtýtsııaǵa sáıkes keledi dep tanydy», - delingen Konstıtýtsııalyq Sot taratqan jazbada.

Ótinishterdiń basym bóligi Astana jáne Almaty qalalarynan, Qostanaı, Qaraǵandy jáne Jambyl oblystarynan kelip tústi.