Konstıtýtsııalyq Sot azamattardyń quqyǵyn qorǵaý kepildikterin kúsheıtedi – Áshimbaev
Qazaqstandyqtar ózderiniń quqyqtary men bostandyqtaryna nuqsan keltiretin zańdar nemese normatıvtik-quqyqtyq aktiler boıynsha sotqa júginýge múmkindik alatyn boldy. Endi azamattardyń ótinishterin Konstıtýtsııalyq sot qabyldaıtyn bolady.
Zań memlekettiń quqyq qorǵaý ınstıtýttaryn kúsheıtedi jáne azamattardyń konstıtýtsııalyq baqylaýǵa qol jetkizý múmkindigin keńeıtýi tıis. Konstıtýtsııalyq sottyń quzyretine saılaý ótkizýdiń durystyǵy, Parlament qabyldaǵan zańdar men halyqaralyq sharttardyń Konstıtýtsııaǵa sáıkestigi máselelerin qaraý, sondaı-aq Konstıtýtsııalyq normalardy resmı túsindirý jatady.
Senat tóraǵasy Máýlen Áshimbaev zańnyń qabyldanýyna túsinikteme bere kelip, júrgizilip jatqan jumystyń basty mindeti – zańnyń ústemdigin qamtamasyz etý, azamattardyń quqyqtaryn qorǵaý kepildikterin kúsheıtý jáne halyqtyń memlekettik ınstıtýttarǵa degen senim deńgeıin arttyrý ekenin aıtty.
«Elimizde júrgizilip jatqan reformalardyń basty maqsaty – adam quqyqtaryn qorǵaý júıesin nyǵaıtý, bılik tarmaqtarynyń jáne ortalyq pen óńirlerdiń arasyndaǵy ókilettikter men jaýapkershiliktiń teńgerimin qamtamasyz etý. Búgin qabyldanǵan zańdar demokratııalyq ınstıtýttardy damytýǵa, halyqtyń memlekettik jáne saıası qurylymdarǵa degen senimin arttyrýǵa yqpal etedi dep senemiz. Bul – Ádiletti Qazaqstan qurý jolyndaǵy mańyzdy qadam», – dedi Máýlen Áshimbaev.
Budan buryn habarlanǵandaı, Búgin Senattyń jalpy otyrysynda «Qazaqstan Respýblıkasynyń Konstıtýtsııalyq Soty týraly» QR Konstıtýtsııalyq Zańy qabyldandy.