Konstıtýtsııalyq reformaǵa baılanysty Qazaqstan azamattary 6 myńnan astam usynys jasady

ASTANA. QazAqparat - Konstıtýtsııalyq reformaǵa baılanysty Qazaqstan azamattary 6 myńnan astam usynys jasady. Bul týraly búgin Aqordada Elbasy Nursultan Nazarbaevtyń tóraǵalyǵymen ótip jatqan bılik tarmaqtary arasyndaǵy ókilettikterdi qaıta bólý jónindegi jumys tobynyń kezekti otyrysynda QR Prezıdenti Ákimshiliginiń basshysy, jumys tobynyń jetekshisi Ádilbek Jaqsybekov málim etti, dep habarlaıdy QazAqparat.

«Konstıtýtsııalyq reformany belsendi talqylaý áleýmettik jelide de qarqyndy júrgizilip, myńdaǵan pikir jazyldy. Óz kózqarastaryn tanymal adamdar, Úkimet músheleri, memlekettik vedomstvolardyń basshylary, qoǵam qaıratkerleri, barlyq saıası partııalardyń ókilderi, shyǵarmashylyq ókilderi, zııalylar, tanymal sportshylar bildirdi. Jumys toby adamdarmen kezdesýlerde aıtylǵan, BAQ pen ınternette jarııa etilgen barlyq pikirlerdi, máseleler men usynystardy tirkedi. Prezıdent Ákimshiligi tarapynan arnaıy poshta mekenjaıy bólinip, oǵan kez kelgen nıet tanytqan azamat óz materıaldaryn jibere aldy. Azamattardyń barynsha besendilik tanytyp, qyzyǵýshylyq kórsetkendigin atap ótken oryndy. Bul Sizdiń Konstıtýtsııalyq reformalardy qoǵamda talqylaý sheshiminiń durystyǵyn taǵy bir márte dáleldeı túsedi», - dedi ol.

Onyń atap ótýinshe, usynystar elimizdiń barlyq óńirlerinen jáne halyqtyń barlyq toptarynan kelip túsken.

«Sońǵy kúnderi usynystar óte kóp boldy. Azamattardan 6 myńnan astam túrli usynystar kelip tústi. Olar Konstıtýtsııanyń 98 babynyń 63-ine qatysty jáne Ata zańnyń barlyq bólimderin qamtıdy», - dedi Jaqsybekov