Konstıtýtsııalyq reforma memleket pen qoǵam úshin asa mańyzdy qadam boldy - Altaı Kólginov
Onyń atap ótkenindeı, Elbasynyń bastaýymen bir aıdan astam ýaqyt boıy keńinen talqylanǵan konstıtýtsııalyq ózgerister halyqtan qoldaý taýyp, Ata zańǵa engizildi. Memleket basshysy bılik tarmaqtary arasyndaǵy ókilettikterdi qaıta bólip, birqataryn Úkimet pen Parlamentke berdi. Soǵan sáıkes jergilikti atqarýshy bıliktiń de róli artyp, quzyrettiligi keńeıetin bolady. Osylaısha elimiz jańa damý kezeńine qadam basty.
Jıynda baıandama jasaǵan «Nur Otan» partııasy oblystyq fılıaly tóraǵasynyń birinshi orynbasary Serik Súleımen táýelsizdiktiń alǵashqy jyldary eldiń tutastyǵyn qamtamasyz etý úshin prezıdenttik ınstıtýttyń múmkindikterin turaqtandyrý qajet bolǵanyn, soǵan sáıkes júrgizilgen reformalardyń halyq arasynda qoldaý tapqanyn jetkizdi.
«Táýelsizdik jyldarynda memleket bıligi qalyptasyp, qoǵamymyzdyń san salaly ómiri damydy, azamattardyń qorǵalýy men qaýipsizdigi, barlyq máseleleriniń sheshilýi, eldiń halyqaralyq saıasatqa bıimdelýi tek Prezıdent arqyly ǵana júzege asty. Qarapaıym adam memlekettik bılikti Prezıdentsiz elestete almaıtyn edi. Memleketti qalyptastyrýdyń alǵashqy jyldarynda bıliktiń Prezıdent qolyna jınalýy, onyń ókilettiginiń qarymdy bolýy sol kezeńdegi saıası ahýaldan týyndaǵan edi. Endi qoǵamymyz jetilip, derbes kəsibı memlekettik tetik qalyptasqan kezde Prezıdenttiń moınyndaǵy júkti jeńildetip, biraz ókilettikti Parlament pen Úkimetke bólip berý - qısyndy qadam, táýelsiz el tarıhyndaǵy batyl betburys. Mundaı mańyzdy qadamnyń elimiz úshin taǵdyrsheshti mańyzy bar. Bul - bizdiń eldigimizdiń eseıýiniń kelisti kórinisi. Jıyrma bes jyldyń ishinde qalyptasqan qoǵamdyq qatynastar memlekettik bıliktiń joǵary organdarynyń bedeli bıiktegenin, olardyń kemeline kele bastaǵanyn bildiredi. Jańa jaǵdaı konstıtýtsııalyq reformanyń qajettigin, ózgeristerdiń pisip jetilgenin kórsetti. Osy arqyly Prezıdent Nursultan Ábishuly Nazarbaev óz halqynyń danalyǵyna senetinin dáleldep otyr. Endi biz sol senimge saı bolýdy qamdaýymyz qajet. Bul rette partııanyń barlyq músheleri óz kúsh-jigerlerin osy senim men jaýapkershilikti aqtaýǵa jumsaýlary kerek», dedi Serik Súleımen.
Elbasy Úndeýin talqylaý maqsatynda oblysta 212 múshesi bar 14 aqparattyq top qurylyp, jumys jasady. Jelilik kestege sáıkes myńǵa jýyq kezdesý uıymdastyrylyp, saıası-buqaralyq jáne túsindirý jumystarymen 160 myńnan astam turǵyn qamtyldy. 100-ge tarta usynystar aıtylyp, olardyń bári jınaqtalyp, memlekettik bılik tarmaqtary arasynda ókilettikterdi qaıta bólý máseleleri jónindegi jumys tobyna joldandy. Eldiń pikirin eskere otyryp, qabyldanǵan konstıtýtsııalyq ózgerister saıası júıeni demokratııalandyrýdaǵy mańyzdy qadam bolǵandyǵy anyq.
Aktıv jıynynda sondaı-aq «Nur Otan» partııasy Zelenov aýdandyq fılıaly tóraǵasynyń birinshi orynbasary Nurjan Dúzbatyrov, «Batys energo resýrsy» JShS-daǵy bastaýysh partııa uıymynyń tóraıymy Svetlana Múkıeva, oblystyq máslıhat depýtaty, «Bolashaq» korporatıvtik qorynyń jetekshisi Saltanat Tumanbaeva jańa reformany qoldaıtyndyqtaryn bildirdi.