Konstıtýtsııalyq reforma qoǵamnyń demokratııalanýyn kúsheıtedi - Q. Baımahanov.

QYZYLORDA. QazAqparat - Memleket basshysy «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» Zańǵa jarııa túrde qol qoıdy.

Prezıdent bul tarıhı sátti «qazirgi basqarý júıesin jańǵyrtýǵa bastaıtyn mańyzdy qadam» dep baǵalady, deıdi «Erlik» úılestirý qoǵamynyń tóraǵasy Qaıreddın Baımahanov. 

«Bılik tarmaqtary arasyndaǵy ókilettikti konstıtýtsııalyq deńgeıde teńgerimdi etýge baǵyttalǵan zań jobasy bir aı boıy qoǵamdyq talqylaýdan ótti.  Osy ýaqyt aralyǵynda halyq belsendilik tanytyp, eldiń basty qujatyna engiziletin ózgeristerge óz usynystaryn bildirdi. Bul usynystar arnaıy qurylǵan jumys tobynyń saraptaýyna jiberilip, olar tujyrym jasaýǵa ózek boldy. 

Engizilgen ózgeristerdiń barlyǵy elimizdiń damýyna erekshe serpin beretin mańyzǵa ıe. Memleket qurylymyna usynylǵan ózgerister qoǵamymyzdy demokratııalandyrý isin kúsheıtip, halyq bıliginiń negizin odan ári nyǵaıtýǵa, Parlamenttiń rólin, Úkimettiń prezıdenttik basqarý nysany aldyndaǵy derbestigi men jaýapkershiligin arttyrýǵa baǵyttalǵan. Reformanyń kózdegen maqsaty da osy. Bul úderis el damýynyń taǵy bir júıeli jáne zańdy kezeńine ótkenimizdi aıqyndaıdy», - dep qorytty oıyn Q. Baımahanov.