Konstıtýtsııalyq ózgeristerge qatysty qujat jobasy jetildirilgen soń Elbasyna usynylady

ASTANA. QazAqparat - Aqordada Memlekettik bılik tarmaqtary arasynda ókilettikterdi qaıta bólý máseleleri jónindegi jumys tobynyń otyrysy ótti, dep habarlaıdy Aqordanyń baspasóz qyzmeti.

Osy aptada «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» Qazaqstan Respýblıkasy Zańynyń jobasyn búkilhalyqtyq talqylaý merzimi aıaqtalady.

Memleket basshysy bastamashylyq jasaǵan konstıtýtsııalyq reformaǵa qoǵamdaǵy qyzyǵýshylyqtyń deńgeıi joǵary bolǵany otyrys barysynda atalyp ótti. Jumys tobynyń atyna Parlamenttiń rólin, Úkimettiń jáne jergilikti bılik organdarynyń jaýapkershiligin kúsheıtý, quqyq qorǵaý qyzmetin jáne sot júıesin jetildirý jóninde, sondaı-aq menshik quqyǵy máseleleri boıynsha úsh myńdaı ótinish kelip tústi. Bul usynystar Memleket basshysynyń konstıtýtsııalyq ókilettikterine de, el zańdary arqyly belgilengen ókilettikterge de qatysty.

Jumys tobynyń músheleri kelip túsken barlyq usynystardy jınaqtap, qorytyp, muqııat qarastyrý ústinde. Bul jumysqa otandyq jáne sheteldik sarapshylar, tıisti memlekettik organdar qatysýda.

«Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» zańnyń jobasy búkilhalyqtyq talqylaý qorytyndylary boıynsha jetildirilip, Memleket basshysyna usynylatyn bolady.