Konstıtýtsııalyq Keńes Úkimetke ana men balanyń quqyqtaryn qorǵaýǵa qatysty usynys berdi

ASTANA. QazAqparat - Búgin Parlament palatalarynyń birlesken otyrysynda QR Konstıtýtsııalyq Keńesiniń tóraǵasy Qaırat Mámı Qazaqstanda ana men bala quqyǵyn qorǵaý máselesin kóterdi, dep habarlaıdy QazAqparat.

«Ústimizdegi jyly Konstıtýtsııalyq Keńes Qaraǵandy oblysynyń Kámeletke tolmaǵandar isteri jónindegi mamandandyrylǵan aýdanaralyq sotynyń «Neke (erli-zaıyptylyq) jáne otbasy týraly» Qazaqstan Respýblıkasynyń 2011 jylǵy  26 jeltoqsandaǵy Kodeksiniń 47-baby 5-tarmaǵyn konstıtýtsııalyq emes dep taný týraly usynysyn qarady. Konstıtýtsııalyq Keńes óziniń 2018 jylǵy 10 sáýirdegi № 3 normatıvtik qaýlysynda áıeldiń júktiligi, bosaný kezindegi jáne odan keıingi ýaqytta ózin kútip-baǵýǵa balanyń ákesinen qarajat alý quqyǵyn, olardyń arasynda nekelik qarym-qatynastardyń bolýyna nemese bolmaýyna qaraı jikteý memlekettiń nekege negizdelgen otbasy ınstıtýtyn qorǵaý boıynsha óz mindettemelerin iske asyrýyna baılanysty dep túsinik berdi», - dep toqtaldy Qaırat Mámı.

Sonymen birge, Konstıtýtsııalyq Keńes tabıǵı jaratylystaný zańdaryna baılanysty júktilik kezeńinde jáne bala ómiriniń alǵashqy jyldarynda balanyń múddesin onyń anasynan bólip qaraý múmkin emes dep atap ótti.

«Osy mańyzdy kezeńde ananyń jáne balanyń quqyqtary men zańdy múddelerin barabar qorǵaýǵa kepildik berý qajet. Ol balanyń jáne onyń qamqory bolyp otyrǵan anasynyń da tirshiligin qajetti deńgeıde barynsha saqtaýdy qamtamasyz etetin tıimdi quqyqtyq tetikterdi belgileýdi bildiredi. Konstıtýtsııalyq Keńes Kodekstiń 47-baby 5-tarmaǵyn konstıtýtsııalyq dep tanı otyryp, neke-otbasy zańnamasynyń jekelegen kemshilikterin kórsetti. Onda Kodekstiń qaralǵan normasyndaǵy «bosanǵanǵa deıingi kezeń» jáne «bosanǵannan keıingi kezeń» degen uǵymdardyń mazmuny jáne olardyń ýaqyt shekteri anyqtalmaǵan», - dep túsindirdi ol.

Q. Mámıdiń sózine qaraǵanda, sottyń atalǵan usynysyn qaraý barysynda nekege turmaǵan áıelderdiń jáne olardyń asyraýyndaǵy múgedek-balalardyń zańdy múddelerin qorǵaýǵa baılanysty basqa da suraqtar týyndady.

«Osyǵan baılanysty, Konstıtýtsııalyq Keńes Úkimetke ana men balanyń quqyqtaryn jáne bostandyqtaryn neǵurlym tolyq qamtamasyz etý maqsatynda «Neke (erli-zaıyptylyq) jáne otbasy týraly» Qazaqstan Respýblıkasynyń 2011 jylǵy  26 jeltoqsandaǵy Kodeksine túzetýler engizýge bastamashylyq jasaý týraly máseleni qaraýǵa usynym berdi», - dep túıdi ol.