Konstıtýtsııaǵa engiziletin ózgerister qazaqstandyq memlekettiliktiń arhıtektýrasyna oń áserin tıgizedi - senator Aqylbaı
«Ótken kezeń ishinde halqymyzdyń birliginiń arqasynda respýblıkamyz barlyq kórsetkishter boıynsha ósý qarqynyna qol jetkize otyryp, áleýmettik-ekonomıkalyq damýda adam aıtqysyz nátıjege qol jetkizdi. Saıasattyń turaqtylyǵy men kópbaǵyttylyǵy elimizdiń ekonomıkasyna úlken ınvestıtsııalar tartýdyń kepili boldy. Barlyq osy jetistikter Elbasymyz, Qazaqstan Respýlıkasynyń Prezıdenti Nursultan Ábishuly Nazarbaevtyń Táýelsizdiktiń alǵashqy kúnderinen bastap júrgizgen salıqaly saıasatynyń arqasynda múmkin boldy. Degenmen osy jetistikterge qaramastan Qazaqstan qol jetkizgen tabystaryna toqtap qalmaı damýdyń jańa belesine túbegeıli jańa ıdeıalarmen ótýde. Sebebi progress, jalpy memlekettiń ómirsheńdik máseleleri árqashanda óziniń ózektiligin saqtap qalýda», - dedi ol.
Senatordyń aıtýynsha, Táýelsizdiktiń barlyq jyldary ishinde zańdar men qoǵam ınstıtýttary adamı sala jáne qoǵam úrdisimen birge birte-birte damýy tıis ekendigin uǵa otyryp, Prezıdent memleketimizdiń damýynyń jańa jolyn taba bilýde.
«Qazaqstan munan ary básekege qabiletti memleket bolýy úshin ne isteýimiz kerek? 25 jyl ishindegi Táýelsizdiktiń barlyq jetistikterin qalaı saqtaýǵa bolady? Memleketti basqarýdyń tıimdiligin qalaı jaqsartýymyz kerek? Elimizge munan da kóp ınvestıtsııany qalaı tartýǵa bolady? Barlyq osy saýaldar ózekti jáne naqty jaýaptardy qajet etedi. Aıtylǵan saýaldarǵa jaýap retinde eldiń saıası ómirindegi jańa baǵyttardy bildiretin nysan - usynylyp otyrǵan konstıtýtsııalyq reforma dep sanaımyn. Qoǵamdyq sananyń ózgerýine áser etetin strategııalyq oılaý qabileti zor saıasatker bolǵandyqtan Elbasy Qazaqstanda demokratııa negizderin odan ary nyǵaıtý maqsatynda Parlament pen Úkimettiń rólin aıtarlyqtaı arttyrýdy usynyp otyr. Elimizdiń qomaqty ósimi men damýy turǵysynan bul qadam tabıǵı evolıýtsııa bolyp tabylady. Álem qıyn kezeńdi bastan keshirip jatqanda Qazaqstan batyl da, baısaldy qadam jasap otyr. Qazirgi tańda qoǵam Prezıdent usynǵan konstıtýtsııalyq reformalar boıynsha mańyzdy sheshim qabyldaý tabaldyryǵynda tur. Bul el tarıhynyń asa mańyzdy sáti bolyp tabylady. Sebebi, meniń oıymsha, Konstıtýtsııaǵa engiziletin ózgerister qazaqstandyq memlekettiliktiń arhıtektýrasyna oń áserin tıgizedi», - dedi senator Aqylbaı.