Konstıtýtsııa - turaqty damýymyzdyń basty kepili - BQO ákimi

ORAL. QazAqparat - Búgin Saltanat saraıynda QR Konstıtýtsııasy kúnine arnalǵan saltanatty jıyn bolyp, onda óńir jurtshylyǵyn merekemen Batys Qazaqstan oblysynyń ákimi Altaı Kólginov quttyqtady, dep habarlaıdy «QazAqparat» tilshisi.

Óńir basshysynyń atap ótkenindeı, 1995 jylǵy 30 tamyz - Qazaqstan halqy tarıhı tańdaý jasaǵan betburys kúni. Osydan 22 jyl buryn halqymyz barsha álemge birligi men danalyǵyn kórsetip, jańa zamannyń talaptaryna saı keletin Negizgi Zańyn bekitti. Sodan beri qoǵamnyń damyp, jańarýyna baılanysty Ata zańǵa birneshe ret ózgertýler engizildi. Aıtalyq, 1998 jyly «Qazaqstan - 2030» strategııasy qabyldanyp, Elbasymyzdyń bastaýymen elimiz ekinshi jańǵyrtýǵa bet alsa, odan soń 2007 jyly saıası partııalardyń esebinen Parlament depýtattarynyń sany arttyryldy. Bıyl qabyldanǵan bılik tarmaqtarynyń keıbir ókilettikterin qaıta bólý týraly konstıtýtsııalyq ózgerister Qazaqstandaǵy saıası, ekonomıkalyq jáne rýhanı jańǵyrýǵa jol ashatyny anyq. 22 jyl ishinde quqyqtyq, áleýmettik memleket qurýdyń barlyq negizderi jasalyp, Qazaqstan irgeli elge aınaldy. Memleket basshysy osy ýaqyt aralyǵynda kóptegen tarıhı sheshimder qabyldady. Sonyń ishinde «Rýhanı jańǵyrý» baǵdarlamasy qoǵam tarapynan qyzý qoldaý taýyp otyr. Bıyl osy baǵdarlama aıasynda Batys Qazaqstan oblystyq «Oral óńiri», «Prıýrale» gazetteriniń jáne Alashorda úkimetiniń 100 jyldyq mereıtoılyq sharalary josparlanyp otyr. Munyń bári - birlik pen kelisimniń arqasy. Konstıtýtsııa - turaqty damýymyzdyń basty kepili.

Saltanatty jıyn barysynda jurtshylyq ókilderi sóz alyp, bir top eńbek ardagerleri men ár túrli sala qyzmetkerlerine «Qazaqstan Respýblıkasynyń Táýelsizdigine 25 jyl» merekelik medali, oblys ákiminiń alǵyshaty, kámeletke tolǵan jastarǵa jeke kýálikteri tabys etildi.