«Qońyraýǵa mán bermegen»: Órt sóndirý qyzmeti úıi órtengen turǵynǵa 11 mln tóleýge mindetteldi

<p>QONAEV. KAZINFORM &mdash; Almaty oblysynda órt sóndirýshilerdiń baıaý áreketiniń kesirinen aýyl azamatynyń úıi órtengen. Endi sot sheshimimen órt sóndirý qyzmeti materıaldyq shyǵyndy óteýge mindetteldi.</p>

Almaty oblysy sotynyń málimetine sáıkes, 2023 jyldyń mamyr aıynda saǵat 17:30 shamasynda Almaty oblysy, Eltaı aýylynyń turǵyny órt sóndirý bólimine telefon soǵyp, úıine jaqyn aýmaqta kepken shóptiń órtenip jatqany týraly habarlaǵan.

Órt sóndirýshiler qońyraýǵa mán bermegen. Órt ornyna ákimdik ókili jetip, jergilikti turǵyndarmen birge qoldan jasalǵan quraldarmen órtti sóndirýge árekettengen. Órt sóndirý qyzmeti jalyndy sóndirýge tek 22:40–ta, ot talap qoıýshynyń úıine jetken kezde ǵana kirisken. Saldarynan úı órtenip, aýyl turǵynyna 11,9 mln teńge materıaldyq shyǵyn keltirilgen.

Osyǵan baılanysty azamat Eltaı aýyldyq okrýgi ákimi apparatynyń jáne Órt sóndirý qyzmetiniń órt kezindegi áreketsizdigin zańsyz dep taný jáne osyǵan baılanysty keltirilgen materıaldyq shyǵyndy óteýdi talap etip sotqa júgingen.

— MAÁS-y Órt sóndirý qyzmetiniń áreketsizdigin zańsyz dep tanyp, keltirilgen materıaldyq shyǵyndy 11,9 mıllıon teńgeni óteýge mindettedi. Órt sóndirý qyzmeti bul sheshimge shaǵym túsirdi. Almaty oblystyq soty is materıaldaryn zerdeleı kele, birinshi satydaǵy sottyń sheshimi zańdy jáne negizdi degen qorytyndyǵa keldi. Іs boıynsha úkim ózgerissiz qaldyryldy, — dep habarlady oblystyq sottan.

Eske salaıyq, buǵan deıin Almaty oblysynda tutynýshy quqyǵynyń buzylýy 68 paıyzǵa óskenin jazǵanbyz.