Kongodaǵy qazaqstandyq bitimgerlerdi BUU marapattady

<p>ASTANA. KAZINFORM &mdash; Kongo Demokratııalyq Respýblıkasynda áskerı qyzmetshiler &ndash; podpolkovnık Altynbek Jalmuhanov pen maıor Batyr Tuıaqov BUU-nyń beıbitshilik pen qaýipsizdikti qoldaýǵa qosqan úlesi úshin medaldarymen marapattaldy. Bul týraly Qorǵanys mınıstrliginiń baspasóz qyzmeti málim etti.&nbsp;</p>

«Saltanatty kúni bitimgerlik kúshter sherýin basqarý BUU mıssııasynyń áskerı baqylaýshylary bas shtabynyń bastyǵy podpolkovnık Altynbek Jalmuhanovqa buıyrdy. Bul bizdiń bitimgerlerdiń el bedeliniń artýyna qosqan úlesi», — dep habarlady vedomstvodan.

Marapattaý rásiminde mıssııa qolbasshysy general-maıor Khar Dıýf Altynbek Jalmuhanovtyń sińirgen eńbegin atap, onyń óńirdegi ahýaldy turaqtandyrýǵa qosqan úlesine, kóshbasshylyq qasıetteri men isine adaldyǵyna toqtalyp ótti.

Foto: QR Qorǵanys mınıstrliginiń baspasóz qyzmeti

Ofıtserler Altynbek Jalmuhanov pen Batyr Tuıaqov «Birikken Ulttar Uıymynyń Kongo Demokratııalyq Respýblıkasyndaǵy turaqtandyrý jónindegi mıssııasy» quramynda qyzmet etip júr.

Maıor B. Tuıaqov — Qazaqstannyń Qarýly kúshterinen osy eldegi bitimgerlik mıssııaǵa qatysýshy alǵashqy ókili. Bir jyl ishinde ol áskerı baqylaýshy retinde abyroımen qyzmet etip, ózin joǵary deńgeıli kásibı maman retinde kórsetti.

Foto: QR Qorǵanys mınıstrliginiń baspasóz qyzmeti

Esterińizge sala ketsek, Birikken Ulttar Uıymynyń Kongo Demokratııalyq Respýblıkasyndaǵy turaqtandyrý jónindegi mıssııasynyń mandaty beıbit turǵyndardy, gýmanıtarlyq personal men quqyq qorǵaýshylardy qorǵaýdy, úkimetti beıbitshilikti turaqtandyrý jáne nyǵaıtý jónindegi jumysyna qoldaý kórsetýdi qamtıdy.

Buǵan deıin Ortalyq Afrıka Respýblıkasyndaǵy qazaqstandyq bitimgerlerdiń kezekti rotatsııasy ótkenin jazǵan edik.