Kongoda túrmeden qashpaq bolǵan 130-ǵa jýyq adam mert boldy

<p>ASTANA. KAZINFORM &ndash; Kongo Demokratııalyq Respýblıkasynda túrmeden qashpaq bolǵan 129 adam qaza tapty. Olardyń ishinde el astanasy Kınshasadaǵy Makala túrmesiniń 24 tutqyny eskertýden keıin oqqa ushty, taǵy ondaǵan adam taptalyp nemese tunshyǵyp qaza bolǵan, dep habarlaıdy <a href="https://www.dw.com/ru/pocti-130-celovek-pogibli-pri-popytke-pobega-iz-turmy-v-dr-kongo/a-70125616" target="_blank" rel="noopener">DW </a>aqparat agenttigi.</p>

Eldiń Іshki ister mınıstri Jakmen Shabanı X áleýmettik jelisinde habarlaǵandaı, oqıǵa 2 qyrkúıekke qaraǵan túni túrmede búlik shyqqan kezde bolǵan. Qurban bolǵandardan bólek, kem degende 59 adam jaraqat aldy, túrmedegi áıelderdi zorlaýdyń birneshe oqıǵasy da tirkeldi.

Búlik kezinde tutqyndardyń qashyp úlgerý-úlgermeýi belgisiz. Jergilikti turǵyndardyń aıtýynsha, qaýipsizdik kúshteri qaza bolǵandardy túrmeden kóliktermen alyp shyqqanǵa deıin birneshe saǵat boıy atys estildi, dep habarlaıdy AFP.

ІІM basshysy túzeý mekemesine aıtarlyqtaı materıaldyq shyǵyn kelgenin málimdedi – túrmeniń ákimshilik ǵımarattary, túrme aýrýhanasy jáne azyq-túlik qoımasy tolyǵymen órtenip ketken.

Makala túrmesi – Kongo Demokratııalyq Respýblıkasyndaǵy eń úlken túrme. Ol 1500 tutqynǵa eseptelgen, biraq resmı statıstıka boıynsha onda budan 10 ese kóp – 14 myńnan 15 myńǵa tutqyn bar.