Kóne Jankent qalashyǵynyń ornynda ejelgi úıdiń biri qalpyna keltirildi

QAZALY. QazAqparat - Zerteýshiler Jankent qalashyǵynyń ishindegi úıdiń birin ejelgi qalpyna keltirip, qaıta jandandyrdy, dep habarlaıdy QazAqparat Qyzylorda oblysy mádenıet, arhıvter jáne qujattama basqarmasyna silteme jasap.

Jankent qalashyǵy – Qazaqstannyń ortaǵasyrlyq tarıhyn, sonyń ishinde túrki-oǵyz taıpalarynyń tarıhyn zetteýde tirek eskertkish bolyp tabylady. Bul eskertkishti 2005 jyldan beri «Halyqaralyq Jankent arheologııalyq ekspedıtsııasy» zerttep keledi. Arheolog, tarıhshy, osteolog, topyraqtanýshy, arhıtektor, geofızık, t.b. ǵalymdardan quralǵan ekspedıtsııa keshendi arheologııalyq jáne pánaralyq zertteý ádisin paıdalanyp keledi.

Aıta ketetin jaıt, oblystyq bıýdjet esebinen Jankent qalashyǵyndaǵy qazba jumystary 2014 jyldan bastap Qyzylorda oblysynyń mádenıet, arhıvter jáne qujattama basqarmasynyń uıymdastyrýymen Qorqyt Ata atyndaǵy Qyzylorda memlekettik ýnıversıtetiniń «Arheologııa jáne etnografııa» ǵylymı-zertteý ortalyǵy tarapynan júrgizilýde.

«Jankent qalashyǵyndaǵy 2016-2020 jyldary birlesip júrgizilgen ǵylymı-zertteýdiń nátıjeleri, qalashyq aýmaǵynda aspan asty mýzeıin uıymdastyrý, eskertkishti saqtap qalý jáne qaıta-qalpyna keltirý jumystary tanystyrylyp, aldaǵy ýaqytta oblys aýmaǵyndaǵy arheologııalyq eskertkishterdi qala tıptes eskertkishterde qazba jáne barlaý jumystaryn júrgizý, monıtorıng, saraptama jasaý, óńirdiń ishki týrızmin damytý jáne týrızm kartasyna eskertkishterdi qosý, arheologııalyq park qalyptastyrý týraly ózekti máseleler baǵamdaldy.

Bıylǵy qazba maýsymynda arheologııalyq zertteýlermen qatar, arhıtektýralyq qurylystardy tumshalaý, qaıta qalpyna keltirý jumystary da qolǵa alynǵan. Mysaly, eskertkish tsıtadeliniń soltústik qorǵan qabyrǵasynda 5 munarasy arshylyp, jaýyn-shashynnan qorǵaý maqsatynda syrty saban jabyndymen jabyldy», delingen habarlamada.

№1 qazbada ornalasqan úıdiń orny qalpyna keltirildi. Jalpy bul qazbanyń aýmaǵy kólemi 400 sharshy metrge jýyq bolatyn temir jabyndymen jabylǵan. Úıdiń úsh turǵyn bólmesiniń qabyrǵalary jergilikti halyqtyń qurylys ádisine aınalǵan «karkasty» ádispen kóterildi. Bólmelerdiń tóbesi pashynmen jabylyp, bólme ortasyna terezesi ornatyldy. Bólmelerdiń ishine er jáne áıel adamnyń, balanyń músinderi daıyndalyp qoıyldy. Osylaısha, Jankentti zerteýshiler qalashyq ishindegi turǵyn úıdiń ejelgi qalpyn qaıta jandandyrdy.

Atalmysh jumystardyń nátıjesinde, eskertkish aýmaǵyndaǵy úı-jaılardyń, bólmelerdiń jaqsy saqtalǵandyǵyn baıqaımyz. Jankentti zertteýshi ǵalymdardyń pikirinshe, keleshekte osy baǵyttaǵy jumystar Jankent qalashyǵynyń aýmaǵynda arheologııalyq parkti qalyptastyrýǵa múmkindik beredi.