Kóne jádigerlerdiń qundylyǵy nede – Qazaqstan Prezıdenti jaýabyn berdi

NUR-SULTAN. QazAqparat – Uly Jibek jolynyń órkenıetterdi toǵystyrǵan kúshke ıe bolǵany eskerile bermeıdi. Bul týraly búgin elordada ótip jatqan Azııa elderi qalamgerleriniń tuńǵysh forýmynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Jahandanýdyń shyǵystyq dástúri naqty sıpatqa ıe bolyp, keńeıe túsýde. Mysaly, qazir Uly Jibek jolynyń ekonomıkalyq mán-mańyzy ǵana kóbirek aıtylady. Shyn máninde onyń tutas órkenıetterdi toǵystyratyn kúshke ıe bolǵany eskerile bermeıdi. Búginde Azııanyń ozyq ekonomıkasymen birge ádebıeti, óneri, bilim júıesi de aldyńǵy qatarǵa shyqty. Azııa halyqtarynyń sóz óneri baı, tamyry tereńde», - dedi Memleket basshysy.

Osy rette Qasym-Jomart Toqaev jer betindegi jazý-syzýdyń shyǵystaǵy Mysyr men Qytaıda paıda bolýy sonyń aıqyn dáleli ekendigine nazar aýdartty.

«Túrki, Qytaı, Úndi, Arab, Parsy elderiniń kóptegen kóne jádigerleri dáýir synynan súrinbeı ótip, búginge deıin jetti. Bul muralardyń qundylyǵy nede? Kóne eskertkishterdiń negizinde jatqan jalpy adamzattyq qundylyqtar ádebıet arqyly álemge taraldy. Ár oqyrmannyń kókeıindegi saýaldardyń jaýaby men jahandyq máselelerdiń sheshimi de dál osyndaı týyndylardan tabylady», - dedi Qazaqstan Prezıdenti.

Eske salsaq, elordada Azııa qalamgerleriniń І forýmy ótip jatyr. Oǵan ádebıet boıynsha Nobel syılyǵynyń 3 nomınaty qatysýda. Jıynda Qasym-Jomart Toqaev «Azııa alyby» halyqaralyq ádebı syılyǵyn taǵaıyndaýdy usyndy.