Kóne Saraıshyq aýmaǵynda Qasym hanǵa eskertkish ornatylmaq

NUR-SULTAN. QazAqparat – Altyn Orda órkenıetiniń ortalyǵy bolǵan kóne Saraıshyq qalasynyń aýmaǵynda Qasym hannyń eskertkishi ornatylýy múmkin. Ortalyq kommýnıkatsııalar qyzmetinde ótken brıfıngide Atyraý oblysynyń ákimi Mahambet Dosmuhambetov osyndaı málimet aıtty, dep habarlaıdy QazAqparat tilshisi.

«Saraıshyqta sapar ortalyǵynan basqa Altyn Orda tarıhyna arnalǵan murajaı salý josparda bar. Tarıhshylar kóne qalada kerýen saraıdan bólek qalqyma kópir bolǵan dep jazady. Sondaı nysandardy uıymdastyryp, sol arqyly keletin týrısterge tarıhpen tanysatyndaı jaǵdaı jasaımyz. Ózimizdiń shamalaýymyzsha, bul joba jylyna 700 myńǵa deıin adam qabyldaýǵa múmkindik beredi. Birinshiden, sheteldik emes, ózimizdiń óńirlerden keletin jastardy, mektep jasyndaǵy balalardy sol jerge aparyp, tarıhqa tanystyramyz», - degen ákim Qasym hannyń eskertkishin salý da josparda bar ekenin aıtty.

«Sheshim qabyldansa, ortalyq memlekettik organdarmen, Úkimetpen birge sol jumystardy júrgizýge daıynbyz. Sondaı usynys berdik. Ári qaraı qoldaý kútip otyrmyz. Siz aıtyp otyrǵan Altyn Ordanyń 750 jyldyǵyna arnalǵan halyqaralyq konferentsııada Qasym hannyń eskertkishin kóterý týraly usynys boldy. Ony da óte durys kórip otyrmyz. Eger Saraıshyqta memorıaldyq keshen bolǵanda ol jerde Qasym hannyń eskertkishi tursa, Saraıshyq týrızmniń úlken bir ortalyǵyna aınalar edi», - dedi Mahambet Dosmuhambetov.