Kóne Otyrar qalashyǵy týrızm ortalyǵyna aınalmaq

TÚRKІSTAN. QazAqparat  - Búgin QR Mádenıet jáne sport mınıstri Arystanbek Muhamedıuly Túrkistan oblysyndaǵy Otyrar aýdanyna arnaıy jumys saparymen keldi. Ol osynda turǵyzylatyn «Otyrar qalajurtynyń sapar-ortalyǵyna» «amanat hat» kapsýlasyn salý rásimine qatysty, dep habarlaıdy QazAqparat tilshisi.

Elbasy Nursultan Ábishulynyń  «Bolashaqqa baǵdar:rýhanı jańǵyrý» atty maqalasy aıasynda uıymdastyrylǵan saltanatty jıynda mınıstr sóz sóılep, tarıhı sáttiń mańyzdylyǵyna toqtaldy.

"Bizdiń maqsatymyz - Elbasy tapsyrmasyn buljytpaı oryndap, tarıhymyz ben mádenıetimizdi álemge pash etý. Búgingi sharamyz Uly Jibek joly boıynda jatqan tarıhı ólkeni sheteldikterge tanytýdyń basy bolmaq",-dedi Arystanbek Muhamedıuly.
 

Óz kezeginde aýdan ákimi Erlan Aıtahanov mınıstrdi Arystanbab kesenesi men Otyrar tóbeni jalǵap turǵan 17 gektar jerde salynatyn nysandardyń jobalarymen tanystyryp shyqty. Munda sapar ortalyǵynan bólek ártúrli nysandar boı kótermek. Etno ortalyq, joǵary dárejeli 60 oryndyq qonaq úı, demalys oryndary salynady.  Bul nysandardyń qurylysyna bıýdjetpen qatar jeke ınvestorlardyń da qarjysy tartylmaq. Osy nysandar paıdalanýǵa berilgende týrısterdiń Otyrar tarıhymen tolyq tanysýyna múmkindikteri bolady.

 Munan soń mınıstr Otyrar tóbedegi qazba jumystarymen tanysyp, qaıta jańǵyrǵan Otyrar memlekettik arheologııalyq qoryq-mýzeıin kórdi. Sondaı-aq  jergilikti jáne "Uly Dala Eline saıahat" ekspedıtsııasynyń jýrnalısterine arnap suhbat berdi.