Kontserttde ataqty kompozıtorlardyń men úshin arnaıy jazǵan ánderin oryndaımyn - Dımash Qudaıbergen

NUR-SULTAN. QazAqparat - Dál qazir otandyq tanymal ánshi Dımash Qudaıbergenniń elordada ótetin jeke kontsertiniń sońǵy daıyndyq jumystary júrip jatyr. Osy turǵyda kontsertke daıyndyq barysymen QazAqparat tilshisi tanysyp kelgen bolatyn.

«Biz qazir sońǵy daıyndyq jumystaryn júrgizip jatyrmyz. Kontserttiń joǵary deńgeıde ótýi úshin kóptegen mamandar eńbek etýde. Bári de oıdaǵydaı ótedi degen nıettemin. Kontserttiń basty ereksheligi - onyń óz Otanymda ótýi. Al onyń barysyna kelsek, jankúıerlerim biledi - men oryndamaı jatyp, bylaı jasaımyn dep aldyn ala aıtqandy unata bermeımin. Aıtarym - jeke kontsertimde kóptegen jańa ánderdi oryndaımyn», - dedi D. Qudaıbergen.

Onyń aıtýynsha, jańa ánderdiń deni qazaq tilinde jazylǵan.

«Ana tilimizdegi ánderden bólek, amerıkalyq jáne eýropalyq kompozıtorlardyń men úshin arnaıy jazǵan ánderin oryndaımyn. Jáne árbir qoıylymda bir-birine uqsamaıtyn ózindik erekshe etıýdter bolady. ıAǵnı árbir ánge jekelegen aıryqsha qoıylym jasalýda», -dedi ol.

Sondaı-aq, ánshi kontsert daıyndyǵyna 500-den astam joǵary kásibı maman tartylǵanyn jáne kesh úshin arnaıy 150 sahnalyq kostıým tigilgenin tilge tıek etti.

«Joǵary deńgeıdegi qoıylymdyq nómirler úshin balet trýppasyna halyqaralyq alańdarda óner kórsetip júrgen  elimizdiń eń úzdik bıshileri men akrobattary tartyldy. Onyń ishinde,  «Notre dame de Paris» mıýzıkliniń ártisteri,  «Tantsy na TNT» jobasynyń qatysýshylary jáne batýttyq  gımnastıka boıynsha sport sheberleri bar», - dedi D. Qudaıbergen.

Aıta keteıik, D. Qudaıbergenniń «Arnaý» atty jeke kontserti 29 maýsym kúni elordadaǵy «Astana Arena» stadıonynda ótedi. Al telekórermender úshin 6 shilde kúni «Astana kúni» merekesine oraı «Qazaqstan» ulttyq arnasynan kórsetiledi.