Qonaqúıler sheteldik qonaqtary týraly aqparat berýge mindetteledi

NUR-SULTAN. QazAqparat – Sheteldikter bes kúnniń ishinde Qazaqstanda tirkelý týraly mindetten bosatylady. Bul sharalar qonaqúılerge mindettelmek. Bul týraly QR Bas prokýrorynyń orynbasary Marat Ahmetjanov málim etti, dep habarlaıdy QazAqparat tilshisi.

«Búginde shetel azamattary bes kún ishinde kóshi-qon organdarynda tirkeýden ótýi tıis. Endi bul norma joıylady. Qonaqúıler jáne qabyldaýshy tarap shetel azamatynyń kelgeni jaıynda kóshi-qon organdaryna ózderi habarlaýy tıis bolady. Bul óz kezeginde Qazaqstannyń qonaqjaılyǵyna ońtaıly áser etedi. Ózderińiz bilesizder, buǵan deıin kóńil kónshitpeıtin oqıǵalar bolǵan, ıaǵnı qonaqúıler tekserilip, reıdter barysynda azamattardyń tirkeýi tekserilgen edi. Osy jaǵdaılar ınvestıtsııalyq tartymdylyqqa áser etip, basqa da saldarǵa alyp kelýi múmkin», - dedi M. Ahmetjanov Senatta tilshiler saýalyna jaýap bere otyryp.

Onyń sózine qaraǵanda, endi qabyldaýshy tarap kóshi-qon organdaryna qonystanǵan adamdar týraly málimet berýge mindetti bolady, al shetel azamattary bul mindetten bosatylady. Eger de qabyldaýshy tarap nemese qonaqúı tıisti aqparatty bermese, onda ákimshilik kodekstegi jaýapqa tartylady.

«Basty maqsat - sheteldik týrısterdi osyndaı mindetten bosatý. Shetel azamattary tirkeletin organdy izdep, áýrege túspeıdi. Bul norma tek shetel azamattaryna qatysty bolyp otyr», - dedi Bas prokýrordyń orynbasary.