Qonaevtan kazınony kóshirý máselesi ázirge qaralyp jatqan joq- ákim

QONAEV. QazAqparat - Qonaev qalasyndaǵy oıynhanalar el ekonomıkasyna mýltıplıkatıvti áser etip, jergilikti turǵyndardy jumyspen qamtamasyz etip otyr. Bul týraly jýrnalısterge baspasóz týr barysynda qala ákimi Nurlan Qumataev aıtty, dep habarlaıdy QazAqparat tilshisi.

«Bizde qalada 15 oıyn aımaǵy bar. Atap aıtar bolsam, 5 kazıno, 4 lot klýby jáne 6 býkmekerlik keńse. Iá, jurt jańa oblys ortalyǵynda kazıno jumys istemeýi kerek dep oılaıdy. Biraq kóptegen azamattarymyz sonda jumys isteıdi. Kazıno mýltıplıkatıvti áser etedi. Biz monıtorıng júrgizdik – onda 7,5 myń adam jumyspen qamtylǵan. Basqa damyǵan elderde de kazınolar bar, biraq olar da osylaı jumys isteıdi. Munda tek kazıno ǵana emes, oıyn-saýyq ortalyqtary, balalar oıyny men qonaq úıde bar. Jazda adamdar kelip demalady. Munda túrli is-sharalar men kontsertter ótedi. Biz de osy baǵytta jumys isteýimiz, damýymyz kerek dep oılaımyn. Ázirge, kazıno jumys isteıdi. Jaqyn arada kóshirý máselesi qarastyrylyp jatqan joq», - dep jaýap berdi qala ákimi baspasóz týr barysynda jýrnalısterdiń saýalyna.

Onyń aıtýynsha, bıyl kazınolar 84 mlrd teńge salyq tólegen. Ákim oıynhanany kóshirý ýaqyt enshisinde ekenin aıtty.

Sonymen qatar ol oıyn aımaqtarynyń basqa jaqqa aýystyrylýyna da qarsy emestigin basa aıtty. Buǵan deıin Úkimette Qonaev qalasyndaǵy kazınony jabý máselesi qaralatyny týraly jazǵan bolatynbyz.

Ashyq kózderden alynǵan foto