Qonaevtaǵy oıynhanalar bıýdjetke qansha salyq tóledi
Qalalyq ákimdiktiń málimetinshe, oıyn bıznesinde 2 306 adam jumys isteıdi, onyń 90 paıyzy - jergilikti turǵyn.
«Salyq jáne bıýdjetke tólenetin basqa da mindetti tólemder týraly» Kodekstiń 557-babyna sáıkes oıynhananyń kiris bóligi salyqtyq qupııa bolyp tabylady. 2023 jyly oıynhanalar men oıyn avtomattary zaldarynan túsken salyq túsimi 46 486 878 310 bolsa, osy jyldyń 9 aıynda 11 953 433 400 teńgege jetti», - dep jaýap berdi qala ákiminiń orynbasary Tólegen Kenjebekov Kazinform agenttiginiń resmı saýalyna.
Sondaı-aq ol oıynhana men oıyn bıznesiniń ózge de sýbektilerin basqa aımaqtarǵa kóshirý nemese jabý josparlary týraly da aıtty. Spıkerdiń sózinshe, QR «Oıyn bıznesi týraly» zańyna sáıkes, oıyn bıznesi nysandarynyń ornalasqan jeri Aqmola oblysynyń Býrabaı aýdany men Almaty oblysynyń Qapshaǵaı sý qoımasynyń jaǵalaýy.
«Oıyn bıznesi sýbektileriniń ornalasqan jerin basqa ákimshilik-aýmaqtyq birlikke berýdi ýákiletti organ aıqyndaıdy», - dedi ol.
Aıtýynsha, jergilikti atqarýshy organdarda oıynǵa táýeldilikten zardap shegetin azamattardyń esebi júrgizilmeıdi. Alaıda bul máseleniń aldyn alý sharalary turaqty túrde júrgizilip turady.
Eske salaıyq, byltyr Almaty oblysynyń ákimi Marat Sultanǵazıev oıynhanaǵa kirý úshin qomaqty qarajat qajet ekenin atap ótken bolatyn. Munan bólek, belgili bir tulǵaǵa qatysty onyń týǵan-týystary tarapynan nemese quqyq qorǵaý organdarynan ótinim túsken jaǵdaıda olar oıynhanaǵa kirigizilmeıdi.