Qonaevtaǵy kópirdi jóndeý jumystary qashan aıaqtalatyny belgili boldy

<p>QONAEV. KAZINFORM - Qonaevtaǵy ońtústik aınalma kópir bir aptadan soń ashylady. Bul týraly kúrdeli jóndeý jumystaryn júrgizip jatqan merdiger kompanııanyń basshysy málim etti.</p>

Janat Esmuhanovtyń sózinshe, kópir eýropalyq tásilmen jańartylyp jatyr. 

«Buryn jalǵanǵan jeri bir ǵana temirmen bekitilgen bolsa, qazir sol jerdiń árqaısysyn ekige bólip, armatýra arqyly beton quıyp bekittik. Ústinen mastıka quıdyq. Bir-birimen jalǵastyryp turǵan tusta aýyr salmaqtaǵy kólikterdiń aǵymyna shydas beretin rezeńke ispettes materıal bolady. Arnaıy generatorlardy ákelip, betondy jylytyp baryp jumys istep jatyrmyz», - dedi merdiger kompanııanyń basshysy.

Sonymen qatar ol kúrdeli jóndeýdi bastapqyda josparlanǵan 1 aı merzimge sozbaı, bir aptadan soń aıaqtaý úshin kúsheıtilgen rejımde jumys istep jatqandaryn jetkizdi. Qazir munda eki aýysymda 10 adam júr. 

Foto: Qonaev ákimdiginen

Qala ákimi Nurlan Qumataev, ońtústik aınalma kópirdiń mańyzdy nysandardyń biri ekenin aıtty. 

«Biz úshin adamdardyń qaýipsizdigi mańyzdy. Kólik qatynasy árdaıym halyqqa yńǵaıly bolýy tıis. Kópirdiń sapaly jasalyp jatqanyna kózim jetti. Qurylys jumystary ózińiz aıtqandaı, erte bitse, tipten jaqsy», - dedi Nurlan Qumataev.

Aıta keteıik, kúrdeli jóndeý jumystary 26 qańtar kúni bastalǵan bolatyn.