Qonaevtaǵy boıjetkenniń ólimi: polıtsııa oqıǵa týraly málimdeme jasady

<p>ASTANA. KAZINFORM &ndash; Qonaev qalasynda 18 jastaǵy boıjetkenniń ólimine qatysty Almaty oblysynyń Polıtsııa departamenti málimdeme jasady.</p>

Polıtsııanyń málimetinshe, 21 naýryz kúni Almaty qalasynyń polıtsııasyna Almaty oblysynyń aýmaǵynda kisi óltirý týraly habarlama kelip tústi.

«Bul aqparatty biz dereý tekserip, nátıjesinde 2006 jyly týǵan qyzdy óltirý deregi rastaldy. Qonaev qalasynyń polıtsııasynda kisi óltirý faktisi boıynsha qylmystyq is qozǵaldy. Polıtsııa qyzmetkerleri 2001 jáne 2003 jyly týǵan eki kúdikti adamdy anyqtap, ustady», - dedi Almaty oblysy PD bastyǵy Baýyrjan Álenov.

Tergeý barysynda kúdiktiler 15 naýryzǵa qaraǵan túni jas qyzdy Qonaev qalasynyń shetinde ornalasqan adam júrmeıtin jerge aparyp óltirgeni anyqtaldy.

«Tergeý áreketteriniń nátıjesinde qyzdy eki adam óltirgeni jasaǵany anyqtaldy jáne olar qamaýǵa alynǵanyn habarlaımyz. QR QPK talaptaryna sáıkes sotqa deıingi tergep-tekserý barysy týraly ózge de aqparat jarııalaýǵa jatpaıdy», - dep tolyqtyrdy oblystyń bas polıtseıi.

Aıta keteıik, marqumnyń esimi – Jannur, ol nebári 18 jasta bolatyn, aspazshy mamandyǵy boıynsha kolledjde oqyp júrgen.

«Týystarynyń aıtýynsha, ólimine kúdikti tórt adam – Qonaev qalasynyń turǵyndary. Olardyń jasy – 18-21 aralyǵynda. Jannur olardyń birimen jaqynda, 7 naýryz kúni tanysqan. Shamamen 14-15 naýryz aralyǵynda aıaýsyz soqqyǵa jyǵyp, óltirip ketken. Týystary keltirgen taǵy bir málimette kúdiktiler boıjetkenniń telefony arqyly nesıe alyp, qala syrtyna shyǵaryp, soıylmen uryp-soqqany aıtylady. Sodan keıin Baqanas baǵytyna qaraı dalada qaldyryp ketken. Týystaryna onyń máıiti 21 naýryzda tabylǵany habarlandy», - dep jazady «Nemolchı» qory.

Týystarynyń aıtýynsha, ekeýi ustalyp, ekeýi bostandyqta júr.