Qonaevta nysandardyń gazǵa qosylý úlesi 33 paıyzdy qurady
Qonaev qalasy ákimdiginiń málimetinshe búgingi kúni Qonaev qalasy men oǵan qarasty eldimekenderde 5 205 tutynýshy gazǵa qosylǵan. Onyń ishinde 4 229 páter, 746 jeke úı, birneshe ákimshilik ǵımaraty bar. Jalpy qaladaǵy nysandardyń gazǵa qosylý úlesi 33 paıyzdy quraıdy.
«Búginde halyqty kógildir otynmen qamtý jumystary júrip jatyr. Bıyl Seıfýllın kóshesi men № 1, 2, 4, 18, «Ivýshka» shaǵyn aýdandaryna gaz qubyryn tartý jumystaryn aıaqtaý josparlanǵan. Al № 19-20, «Spýtnık», «Arna», «Qarlyǵash» shaǵyn aýdandaryna gaz qubyryn júrgizý jergilikti bıýdjet esebinen júzege asatyn bolady. Ol úshin jobalyq-smetalyq qujaty ázirlenip, memlekettik saraptamaǵa jiberildi», - dep habarlady ákimdiktiń baspasóz qyzmeti.
Sondaı-aq Qonaev qalasy oblys ortalyǵy bolyp, onda qurylystar qarqyndy júrip, halyq sany ósip kele jatqanyna baılanysty qosymsha avtomattandyrylǵan gaz taratý stantsııasy men gaz taratý jelilerin iske qosý qajettiligi týyndap otyr.
«Atalǵan baǵytta da jumystar júrgiziledi. Aıta keterligi, jaýapty mekemege túsken ótinishterge baılanysty qaladaǵy páterler men jeke turǵyn úıler gazǵa qosylady», - dep habarlady ákimdikte.