Qonaevta merdiger 180 otbasyna arnalǵan úsh úıdi ýaqytynda salyp bitirmedi

<p>QONAEV. KAZINFORM — Qonaev ákimdigi turǵyn úı qurylysyna jaýapty merdiger kompanııany sotqa berdi.</p>

Qonaev qalasynyń ákimi Nurlan Qumataev, birneshe qurylys nysanyn aralap kórdi.

Olardyń qatarynda № 10 shaǵyn aýdanda qurylysy uzaqqa sozylǵan 60 páterli úsh turǵyn úı bar.

Kópqabatty úılerdiń syrtqy jáne ishki jumystary áli aıaqtalmaǵan.

Foto: Qonaev ákimdigi

Qalanyń kommýnaldyq qyzmeti barlyq ınfraqurylymdy tartyp qoısa da, úı jelilerge qosylmaǵan. 

«Sizder jumysqa selqos qaramasańyzdar, jańa jylda 180 otbasy baspanaly bolar edi. Bekitilgen merzimnen 2 aıǵa keshigip jatsyzdar. Qurylys bólimi olqylyqtardyń ornyn toltyrý baǵytynda 5 hat joldaǵan, endi sizderdiń kompanııany jaýapsyz dep taný úshin sotqa berdi. Eń bastysy, sizder mynany túsinýińiz kerek, úı kezeginde turǵandar páter kiltin asyǵa kútip otyr. Onyń ishinde kópbalaly otbasylar, múgedekter jáne basqa áleýmettik osal toptaǵy jandar bar», — dedi Nurlan Qumataev «Sheberbuild» JShS ókilderine qarata sóılep.

Aıtýynsha, úı qurylysynan bólek, aýlalardy abattandyrý jumystyry da áli bastalmaǵan. 

Shahar basshysy merdiger kompanııamen birge tapsyrys berýshi turǵyn úı kommýnaldyq sharýashylyǵy men qurylys bólimi de jaýapqa tartylatynyn aıtty.

Foto: Qonaev ákimdigi

Sondaı-aq ol «Sheberbuild» JShS Qonaevta qurylysy júrip jatqan basqa nysandarda merdiger ekenin tilge tıek etti.

Olardyń da jumysy merziminen kesh qalǵan.

Sondyqtan ákimdik kompanııany jaýapsyz dep taný úshin sotqa júginbek.