Qonaevta arnaıy akademııalyq qalashyq qurý pysyqtalyp jatyr – Qýanysh Erǵalıev

ASTANA. QazAqparat – Ortalyq kommýnıkatsııalar qyzmetindegi brıfıngide Ǵylym jáne joǵary bilim vıtse-mınıstri Qýanysh Erǵalıev Almatydaǵy ýnıversıtetterdi Qonaevqa kóshirý boıynsha atqarylyp jatqan jumystarǵa toqtaldy, dep habarlaıdy QazAqparat tilshisi.

«Qazirgi tańda Qonaev qalasynda arnaıy akademııalyq qalashyq qurý máselesi pysyqtalyp jatyr. 1-2 ret biz ákimdiktiń ókilderimen kezdesip, osy máseleni talqyladyq. Biz tek joǵary oqý oryndaryna jaýapty bolǵannan keıin, Ál-Farabı atyndaǵy ulttyq ýnıversıtetti nemese Q.Satpaev atyndaǵy úlken ýnıversıtettiń keıbir fakýltetterin kóshirýge múmkinshilik bar-joǵyn qarastyryp jatyrmyz. Óıtkeni, Ál-Farabı atyndaǵy qazaq ulttyq ýnıversıtetiniń ózinde eń úlken jataqhana tapshylyǵy bar. Biraq basqa jeke ýnıversıtetter qalanyń syrtyna kóshemin deıtin bolsa, sol máseleni de qarastyryp jatyrmyz qazirgi tańda», - dep atap ótti Qýanysh Erǵalıev.

Onyń aıtýynsha, joǵary oqý oryndaryn jańadan qurylǵan oblystyń ortalyǵyna kóshirý jataqhana máselesin sheshýge de yqpal etpek.

Aıta keteıik, buǵan deıin vıtse-mınıstr Almatydaǵy stýdentterdiń 54 paıyzy ǵana tıisti jataqhanamen qamtamasyz etilgenin málimdegen edi.

Foto: ortcom.kz