Qonaev turǵanda Kappadokııaǵa barýdyń qajeti joq: Qazaqstanda alǵash ret áýe sharlary festıvali ótti
Halyqaralyq sharlar festıvalin uıymdastyrýshylardyń basty maqsaty – qaldyqtardy bólek jınaý, qaıta óńdeý, ekologııalyq taza, ıaǵnı qaıta óńdeýge bolatyn ydys-aıaqtar men basqa da ekomaterıaldardy paıdalaný arqyly tabıǵatqa jáne onyń resýrstaryna qurmetpen qaraýdy nasıhattaý.
«Oblysta týrızmdi ilgeriletý jáne damytý oqıǵaly týrızmge negizdelgen. Osyǵan oraı, búgingi «Konayev international balloon fest» shar festıvaliniń is-sharasy bizdiń óńirimizdegi aıtýly oqıǵa bolmaq, bul – bizdiń qonaqtarymyz úshin tabıǵattyń sulýlyǵyn tamashalaýǵa tamasha múmkindik. Munda bir-birimen tanysýǵa, dostyq qarym-qatynas ornatýǵa jáne umytylmas áser alýǵa bolady. Búgin tańǵy saǵat 5-ten bastap festıvalge jınalǵan kórermender osyndaı sulýlyqty tamashalaýǵa shabyttandy, tipti saǵat 7-ge taman sharlarmen bıiktikke shyǵýǵa nıet bildirgenderdiń uzyn kezegi paıda boldy. Demek, osy arqyly biz oqıǵaly týrızmniń jumys isteı bastaǵanyn kórsetemiz.
Bul sharaǵa 6 aı boıy daıyndaldyq, taldaı kele, Qazaqstanda sharlarǵa arnalǵan is-sharalar bolmaǵanyn kórdik. Áleýmettik jeli qoldanýshylary «Qonaev turǵanda Kappadokııaǵa barýdyń qajeti joq» dep jazyp jatyr», - dedi Almaty oblysynyń ákimi Marat Sultanǵazıev.
Sondaı-aq, Óńirdiń týrıstik áleýetin keńinen nasıhattaý maqsatynda «Tengrı ýltra» halyqaralyq Uly dala marafony, halyqaralyq Іle-Balqash regatasy ótkizildi, «BBC News» halyqaralyq telearnasynda (450 mıllıon aýdıtorııa) óńirdiń ásem de baı tabıǵaty týraly jarnamalyq naýqan bastaldy.