Qonaev qalasynyń ákimdigi oblys ortalyǵy shekarasynyń ózgerýine baılanysty málimdeme jasady
Qala ákimdiginiń baspasóz qyzmeti habarlaǵandaı, qala ákimi Nurlan Qumataev Zarechnyı aýyldyq okrýginiń (Zarechnyı, Arna aýyldary) 9757 gektar jeri G4 Sity jobasynyń quramyna enýine baılanysty turǵyndar negizsiz qaýiptengenin aıtty.
Ákimniń aıtýynsha, atalǵan ózgerister halyqtyń turmys-tirshiligine áser etpeıdi. Sebebi turǵyndar qazirgi áleýmettik jáne ákimshilik ortalyqta qyzmet alatyn bolady.
«Mundaı ózgerister G4 Sity jobasynyń júzege asýy úshin jasalyp jatyr. Biz aýyldyq okrýg turǵyndaryna áleýmettik jáne ákimshilik qyzmetter kórsetýdi ary qaraı jalǵastyra beremiz. Onyń ústine qazirgi tańda kóptegen memlekettik qyzmetti elektrondy úkimet portaly arqyly alýǵa bolady. Balalardy balabaqshaǵa kezekke qoıý, mektepke oqýǵa berý, barlyǵy da elektrondy formada retteledi. Aýyl halqynyń tynys-tirshiligi únemi nazarda», - dedi Nurlan Qumataev.
Sondaı-aq Qonaev qalalyq kópsalaly aýrýhananyń dırektory Aıman Rakısheva Zarechnyı aýyldyq okrýginiń turǵyndary aldaǵy ýaqytta Іle aýdany Ótegen batyr kentindegi medıtsınalyq mekemede em qabyldaıdy degen pikirdi teriske shyǵardy.
«Zarechnyı aýyldyq okrýginiń turǵyndary ary qaraı da bizdiń aýrýhanada emdeledi. Atap ótý kerek, Zarechnyı aýylynda óziniń dárigerlik ambýlatorııasy bar. Bizge júgingen ár naýqasqa tolyqqandy medıtsınalyq kómek kórsetiledi», - dedi aýrýhana basshysy.
Aıta keteıik, 31 qazanda qalalyq máslıhattyń kezekten tys HІІІ sessııasy ótti. Jıynda Qonaev qalasy men Almaty oblysyndaǵy aýyldyq okrýgterdiń shekarasyn ózgertý týraly másele qaralǵan bolatyn.
Eske salsaq, Memleket basshysy Almaty oblysyndaǵy G4 City qalasyn damytýǵa qatysty tapsyrma bergen bolatyn.
Keıin Úkimet qaýlysymen 2048 jylǵa deıingi kezeńge Almaty oblysynda aýdany 30 myń ga G4 City arnaıy ekonomıkalyq aımaǵy (AEA) qurylǵan edi.