Qonaev ákimdigi jabaıy saýda oryndarymen qalaı kúrespek

<p>QONAEV. KAZINFORM &ndash; Qonaevta zańsyz saýdamen kúresýdiń jańa tetigi qoldanylady. Bul týraly shahardyń belgilenbegen oryndarda saýda jasaıtyndarmen kezdesken qala ákimi Ashat Berdihanov aıtty.</p>

Foto: Qonaev ákimdigi

Abaı kóshesiniń boıynda zańsyz saýda jasaıtyndar ákimnen kúnkóris kózinen aıyrmaýdy surady.

Shahar basshysy bolsa, ákimdiktiń ustanymyn túsindirip, olarǵa birneshe talap qoıdy.

Foto: Qonaev ákimdigi

«Buǵan deıin sizderge «Aısha sıtı» bazarynda 6 aı, «Jetisý» bazarynda 3 aı tegin saýda jasaý úshin oryndardy daıyndap berdik. Tutynýshy az bolatynyn alǵa tartyp, barmadyńyzdar. Qazir qala úlkeıip, kúnnen-kúnge damyp keledi. Máseleni bir jaǵyna shyǵarýymyz kerek. Abattandyrylyp, ádemi bolyp turǵan kósheniń kelbetin zańsyz saýda oryndary buzyp turǵanyn bárimiz túsinýimiz qajet», - dedi Ashat Berdihanov.

Sonymen qatar ol turǵyndardan jıi shaǵym túsetinin atap ótti.

«Turǵyndar aýlada saýda jasaıtyndar qoqystaryn tastap ketetinin, aıaq alyp júre almaıtyndaı jaǵdaı týǵanyn aıtyp, jıi shaǵymdanady. Sizderdiń qamdaryńyzdy oılap, problemaǵa birjaqty qaraýǵa bolmaıdy», - dedi shahar basshysy.

Foto: Qonaev ákimdigi

Ákim túıtkildi sheshý úshin «Aısha sıtı» bazarynyń aldyna dúńgirshekter qoıylatynyn jetkizdi.

«Ákimdik barlyq turǵynnyń qamyn oılaıdy. Sol úshin sizderdi tyńdaı kele, bazardyń aldynan dúńgirshekter ornatýdy jón kórip otyrmyz. Biraq, bıznes oryndary qoıylǵanda sizder jeke kásipker retinde tirkelip, salyq tólep, jumys jasaýlaryńyz qajet», - dedi ákim.

Foto: Qonaev ákimdigi

Bazar basshylyǵyna jańadan salynyp jatqan nysandy biryńǵaı dızaın-kodqa sáıkes etip jasaýdy tapsyrdy.