«Qonaev» ÁKK qarajatty depozıtke salǵan — Joǵary aýdıtorlyq palata

<p>ASTANA. KAZINFORM &mdash; Joǵary aýdıtorlyq palata Almaty oblysynda memlekettik resýrstardyń paıdalanylý tıimdiligine aýdıtti aıaqtady. Onyń nátıjeleri Álıhan Smaıylovtyń tóraǵalyǵymen ótken palata otyrysynda qaraldy.</p>

Memleket basshysynyń bastamasy aıasynda Almaty oblysy 2022 jyly Jetisý oblysynyń qurylýymen ekige bólindi, al onyń jańa ortalyǵy Qonaev qalasy boldy. Óńir ekonomıkasynyń negizgi draıverleri — ónerkásip pen agroónerkásiptik keshen. Almaty oblysynyń ónerkásibi 90% óńdeýshi sektor kásiporyndarynan turady. Bul — respýblıkadaǵy eń joǵary kórsetkishterdiń biri. 2023 jyly óńirde 30-dan astam jańa óndiris iske qosyldy, bul myńnan astam jumys ornyn qurýǵa múmkindik berdi.

«Sonymen birge, aýdıtorlyq is-sharalardyń qorytyndysy boıynsha jergilikti atqarýshy organdardyń respýblıkalyq bıýdjetten transfertterge tym táýeldi ekeni anyqtaldy. Jeke ınvestıtsııalardyń resýrstary tolyq qoldanylmaıdy. Merdigerlik uıymdardyń bıýdjettik ınvestıtsııalyq jobalardy iske asyrý merzimderin keshiktirýi saldarynan bolatyn júıelik problemalar jergilikti bıýdjetke qosymsha júkteme salyp otyr. Máselen, 2022 jyly quny 129 mlrd teńgeden asatyn 110 joba jáne 2023 jyly 110 mlrd teńgeden asatyn 81 joba normatıvtik merzimde aıaqtalmaǵan. 2021 jyly bastalǵan 5 avtojoldyń qurylys-montajdaý jumystary qarjylandyrylmaýyna baılanysty toqtap tur», — delingen Joǵary aýdıtorlyq palata málimetinde.

Qazirgi Alataý qalasynyń nysandaryna qatysty kemshilikter anyqtaldy. Bul turǵydaǵy jumystar G4 City jobasy aıasynda 10 jyldan astam ýaqyt buryn bastalǵan. Atap aıtqanda, býhgalterlik esepte kemshilikter belgili boldy.

«Budan bólek, «Qonaev» ÁKK» AQ «aınalym shemasy» arqyly baǵany turaqtandyrý tetigin iske asyrýǵa alynǵan 4 mlrd teńge kredıttik bıýdjet qarajatynyń tek 1,5 mlrd teńgesi (38%) jumsalǵan. Qalǵan 2,5 mlrd teńge (62%) júıeli túrde depozıtterge salýmen bank shottarynda saqtalyp jatyr. Jalpy, aýdıtorlyq is-sharalardyń nátıjesinde Almaty oblysynda jalpy somasy 16,7 mlrd teńgege qarjylyq talaptardy buzý derekteri anyqtaldy, onyń 12,2 mlrd teńgesi býhgalterlik esepti júrgizýge qatysty. Qazir aýdıt qorytyndysy boıynsha anyqtalǵan kemshilikterdi 96 paıyzdan astamy joıyldy. Sondaı-aq qarjy salasyndaǵy tıisti rásimder boıynsha talaptardy buzýdyń 485 jaǵdaıy jáne 20 júıelik kemshilik anyqtaldy», - dep atalyp ótken palata aqparatynda.