Kompozıtor Nurlan Bekenov Farıza Ońǵarsynovaǵa arnap kúı shyǵardy
Astana Memlekettik akademııalyq fılarmonııasy halyq aspaptary orkestriniń dırıjeri, kúıshi Nurlan Bekenov atalǵan kúıdiń qalaı týǵanyn aıtyp berdi.
«Farıza Ońǵarsynovanyń qazaq ádebıetindegi alatyn orny erekshe ekeni belgili. Búkil túrki áleminiń rýhanı baılyǵyna qosqan úlesi de óte mol. Ol tereń lırıkalyq óleńder jazǵan aqyn. Sonymen qatar adamǵa qaırat beretin daýylpaz jyrlardyń da avtory. Ádebıetimizge úlken jańalyq alyp kelgen qalamger ǵoı. Ózim biraz ýaqyt boıy Farıza aqynnyń jan-dúnıesin ashatyn, halqyna aıta almaı ketken oılaryn jetkizýge tyrysatyn bir kúı shyǵarsam degen tolǵanysta júrdim. Ónerdegi ustazym, Astana Memlekettik akademııalyq fılarmonııasy halyq aspaptary orkestriniń kórkemdik jetekshisi ári bas dırıjeri, Qazaqstannyń eńbek sińirgen qaıratkeri, professor Aıtqalı Jaıymov aǵamyz jáne basqa da azamattar Farızaǵa arnalǵan kúı shyǵatyn bolsa, ol ulttyq ónerimizge qosqan naqty úlesimiz bolatynyn aıtty. Maǵan osy turǵyda oılanyp, jańa shyǵarma jazý týraly keńes berdi. Mine, jýyrda ǵana jańa kúı dúnıege keldi»,- dedi Qazaqparat tilshisine bergen suhbatynda kompozıtor Nurlan Bekenov.
Bul F.Ońǵarsynqyzyna arnalǵan tuńǵysh kúı ekenin aıta ketken jón. 23 qańtar kúni «Astana» kontsert zalynda elordamyzdyń Memlekettik akademııalyq fılarmonııasy halyq aspaptary orkestriniń ujymy Farıza Ońǵarsynovanyń 80 jyldyǵyna arnalǵan arnaıy ádebı-mýzykalyq kesh ótkizgeli otyr. Sol keshte aqynǵa arnalǵan jańa ánder jáne atalǵan kúı oryndalady dep kútilýde.