Kompanııalardaǵy basshy áıelder úlesin arttyrý kerek – Memleket basshysy

NUR-SULTAN. QazAqparat – Kompanııalardaǵy basqarýshylyq laýazymdarda áıelderdiń úlesin 30 paıyzǵa deıin arttyrý kerek. Bul týraly Ulttyq qoǵamdyq senim keńesiniń tórtinshi otyrysynda Prezıdent Qasym-Jomart Toqaev málim etti, dep habarlaıdy QazAqparat tilshisi.

Prezıdent memlekettiń qatysýymen qyzmet etip júrgen kópshilik kompanııalarda áıelderdiń úlesi áli de tómen ekenin, ıaǵnı 5-7 paıyz shamasynda ekenin aıtty.

«Osyndaı jaǵdaı el turǵyndarynyń jartysynan astamyn qurap turǵan áıelderdiń áleýetin tolyqtaı júzege asyrýǵa múmkindik bermeıdi», - dedi Memleket basshysy.

Prezıdent keńes músheleri bul máseleni jan-jaqty qarastyrǵanyn, memlekettiń qatysýy bar kompanııalardyń basshylyq organdarynda áıelderdiń úlesin 30 paıyzǵa deıin arttyrý týraly mindetti normany engizý qajettigin usynǵanyn aıtty.

«Atalǵan bastamany kezeń-kezeńmen júzege asyrý týraly oılastyrýymyz kerek dep sanaımyn. Bul óz kezeginde bıznes salany áıelder úshin tartymdy etip, mamandandyrylǵan halyqaralyq reıtıngilerde Qazaqstannyń pozıtsııalaryn joǵary kóteredi», - dedi Q. Toqaev.