Kompanııalar tabıǵatty qorǵaýǵa 145 mlrd teńge bóldi – Ekologııa mınıstrligi

NUR-SULTAN. QazAqparat – Byltyr Qazaqstanda kásiporyndardyń emıssııaǵa tólemderi 96 mlrd teńgeni qurady. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev málim etti, dep habarlaıdy QazAqparat tilshisi.

«Aldyn ala derekter boıynsha 2019 jyly kásiporyndardyń emıssııaǵa tólemderi 96 mlrd teńgeni qurady. Sonymen qatar, 2019 jyly kompanııalar tabıǵatty qorǵaý is-sharalaryna 145 mlrd teńge jumsady. Jıyntyǵynda bul 240 mlrd teńgeden astam qarajatty quraıdy», - dedi mınıstr Májiliste jańa Ekologııalyq kodeks jobasyn tanystyra otyryp.

Onyń sózine qaraǵanda, ozyq qoljetimdi tehnologııalardy engizý kezeńi 10 jylǵa deıin merzimdi quraıtynyn eskere otyryp, kásiporyndardyń OQT-ny endirý úshin óndiristi jańǵyrtýǵa jınaqtalǵan áleýetti qarajaty 2 trln teńgeden astam quraıtyn bolady.

«Bul qarajat ozyq qoljetimdi tehnologııany endirý úshin jetkilikti bolady dep esepteımiz», - dedi Myrzaǵalıev.

Budan buryn habarlanǵandaı, vedomstvo basshysy Qazaqstannyń iri kásiporyndarynda ozyq qoljetimdi tehnologııalardy engizý josparymen bólisti.