Kompanııalar qaı sala mamandaryna joǵary jalaqy tóleýge daıyn

NUR-SULTAN. QazAqparat – Jumys izdeý jáne qyzmetkerlerdi irikteýge arnalǵan HeadHunter onlaın-platformasy jumys berýshi kompanııalardyń qansha jalaqy tóleýge daıyn ekenine sholý jasady, dep habarlaıdy QazAqparat tilshisi.

Sholý HeadHunter saıtynda jarııalanǵan bos jumys oryndary men qyzmet izdegen azamattardyń túıindemeleri negizinde ázirlengen.

Onlaın-platforma málimetine sáıkes, bıylǵy II toqsanynda jumys berýshiler usynǵan jalaqy 1,25 paıyzǵa ósken. Degenmen bul - qyzmetke turýǵa nıetti azamattar úshin az.

Óıtkeni, jumys izdeýshilerdiń basym bóligi orta eseppen 295 myń teńge jalaqy alýǵa úmitti.

Al qazir usynylyp otyrǵan eńbekaqy bul suranystan 17,6 paıyzǵa az. ıAǵnı, búginde eńbekker izdegen kásiporyndar 243 myń teńge tóleýge daıyn.

Eń joǵary jalaqydan úmitti jumys izdeýshiler eki qalaǵa nazar qoıǵany abzal.

Olar – Nur-Sultan (ortasha jalaqy 281 myń teńge) jáne Almaty (ortasha jalaqy 248 myń teńge) qalalary. Elimizdiń basqa óńirlerde jalaqy tómen.

Qazirgi ýaqytta joǵary eńbekaqy keńes berý salasynyń mamandarynda. Bul salaǵa rıeltor, derekterge taldaý jasaý jáne brokerler kiredi.

Atalǵan baǵytta qyzmet etkisi keletin azamattarǵa kompanııalar ortasha eseppen 520 myń teńge jalaqy tólemek. Sondaı-aq, shıkizat óndirý salasyna (geodezıs, ınjener, geolog) nazar aýdarǵan jón.

Bul sala mamandarynyń ortasha jalaqysy 400 myń teńgeden asady. Buǵan qosa IT tehnologııalarmen aınalysatyn mamandardyń jalaqysy joǵary.

Tájirıbesiz qyzmetkerler úshin ortasha jalaqy - 220 myń teńge bolsa, kópjyldyq qyzmet ótili bar jumyskerlerge shamamen 850 myń teńge aılyq usynylyp otyr.