Kommýnıstik partııa Qordaıda kóz jumǵan marqumdardyń otbasyna kóńil aıtty
«Qazaqstan kommýnıstik halyq partııasy Jambyl oblysynyń Qordaı aýdanyndaǵy tártipsizdik saldarynan qaza bolǵan azamattardyń otbasyna qaıǵyryp kóńil aıtady. Kommýnıster adam shyǵyny oryn alǵan oqys oqıǵa obektıvti túrde tekserilip, kináliler qatań jaýapqa tartylýy tıis dep sanaıdy. Biz ınternatsıonalızm ıdeıasy men halyqtar baýyrlastyǵy nasıhattalatyn kópultty elde buzaqylardyń bassyzdyǵy túrli etnostar arasynda qalyptasqan dostyq qarym-qatynasqa syna qaǵa almaıtynyna senemiz», - dep jazady partııa.
Kommýnıster qazaqstandyqtardy arandatýshylyqqa urynbaýǵa shaqyrdy.
«Biz aqyl - jeńedi, ashý - basylady, shyndyq - anyqtalady, quqyq qorǵaýshylar kinálilerdi taýyp, jazasyn beredi, al baýyrlarymyz ben qaryndastarymyzdyń shańyraǵyna tynyshtyq ornaıdy dep úmittenemiz. Qazaqstan - bizdiń ortaq úıimiz, árqaısymyz onyń qaýipsizdigi men turaqtylyǵyna jaýaptymyz. Bizdiń qýatymyz bizdiń tutastyǵymyzda. Biz birge bolǵanda ǵana syn-qaterlerge tótep beremiz», - deıdi partııa basshylyǵy.
Qazaqstan kommýnıstik halyq partııasy tergeý jumystarynyń obektıvtiligin baqylaýda ustaıdy jáne qoǵamdyq qaýipsizdik salasyndaǵy memlekettik saıasattyń tıimdiligin arttyrýdy talap etedi.