Kommýnıstik halyq partııasy kezekten tys saılaýǵa baılanysty sezd ótkizedi

NUR-SULTAN. QazAqparat - Qazaqstannyń kommýnıstik halyq partııasy 26 sáýirde sezd ótkizip, kezekten tys prezıdent saılaýyna kandıdat usynýdy josparlap otyr. Bul týraly Parlament Májilisindegi «Halyq kommýnısteri» fraktsııasynyń basshysy Aıqyn Qońyrov málim etti, dep habarlaıdy QazAqparat tilshisi.

«QKHP Ortalyq komıtetiniń saıası bıýrosy kezekten tys prezıdent saılaýyna arnap bıyl 26 sáýir kúni kezekten tys sezd shaqyrý týraly sheshim qabyldady. Onda partııa usynatyn kandıdat máselesi sheshiledi», - dedi ol jýrnalısterge.

Onyń aıtýynsha, QKHP kezekten tys saılaýǵa qatysý týraly naqty sheshim qabyldap otyr.

«Sezde usynylǵan kandıdattardyń ishinen eń laıyqtysy iriktep alynyp, ol partııanyń atynan saılaýǵa qatysady», - dedi ol.

Aıqyn Qońyrovtyń sózine qaraǵanda, ol kommýnıstik partııanyń hatshysy bolǵandyqtan, óz kandıdatýrasyn saılaýǵa ózi usyna almaıdy.

«Biz demokratııalyq tsentralızmdi ustanamyz. Eger sezd delegattarynyń basym kópshiligi meniń kandıdat retinde prezıdent saılaýyna qatysqanymdy qalasa, men onymen kelisemin», - deıdi A. Qońyrov.

Eske sala keteıik, Memleket basshysy Qasym-Jomart Toqaev Qazaqstan halqyna úndeý joldap, Qazaqstanda 2019 jylǵy 9 maýsymda kezekten tys prezıdent saılaýy ótetinin jarııalaǵan bolatyn.

Prezıdent Qazaqstan halqyn aldaǵy saılaýǵa barynsha jaýapkershilikpen qaraýǵa shaqyrdy.

Avtor: Damır Baımanov