Kommýnaldyq tólemder tabysynyń 10%-nen asyp ketken turǵyndar memleket kómegin ala alady

ASTANA. QazAqparat – Tarıfterdiń ósýi az qamtylǵan otbasylar tabysyna áser etpeıdi. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Buryn biz ınvestıtsııalyq baǵdarlamalardy jáne tabıǵı monopolııa sýbektileriniń tarıfterin túzete almaıtyn edik. Endi oǵan múmkindik bar. Tarıfterdiń ósýi az qamtylǵan otbasylardyń tabysyna áser etpeıdi. Bul másele jan-jaqty pysyqtaldy. Jergilikti bıýdjet qarajaty esebinen az qamtylǵan otbasylarǵa kommýnaldyq qyzmetterge aqy tóleý úshin turǵyn úı kómegi berilýde», - dedi Premer-Mınıstr Úkimet otyrysynda.

Onyń aıtýynsha, tólem kommýnaldyq qyzmetterge jumsalatyn shyǵystar otbasynyń aı saıynǵy ortasha jıyntyq tabysynyń 10%-nen asyp ketken jaǵdaıda tólenedi.

Indýstrııa jáne ınfraqurylymdyq damý mınıstrliginiń túsindirýinshe, kez kelgen turǵyn tabysynyń 10%-ynan astamy kommýnaldyq tólemge jumsalǵanyn qujattar arqyly rastap, ákimdikke júgine alady. Atalǵan tólemder toqsan saıyn tólenedi.

«Mysaly adam 200 myń teńge jalaqy alsa, kommýnaldyq shyǵyndar 25 myń teńge bolsa, qalǵany ákimdik tarapynan tólenedi. Bul tólem úshin jalǵyz baspanasy bar adamdar, kommýnaldyq baspana qorynan jaldap turatyndar júgine alady», - dep túsindirdi QR IIDM Qurylys jáne turǵyn úı-kommýnaldyq sharýashylyq isteri komıteti Turǵyn úı sharýashylyǵy basqarmasynyń basshysy Sultanǵalı Jalqul.

Aıta keteıik, bıyl turǵyndar úshin tarıfter 10%-ten 30%-ke deıin ósedi.

Buǵan deıin Ulttyq ekonomıka mınıstri Álibek Qýantyrov «Tarıfti ınvestıtsııalarǵa aıyrbastaý» baǵdarlamasy qalaı júrgiziletinin túsindirgen edi.

Sondaı-aq, Premer-Mınıstr sońǵy eki jyl boıy Qazaqstanda elektr energııasynyń tapshylyǵy sezilip jatqanyn aıtty.