Kommýnaldyq tarıfti kóterýge jarııalanǵan moratorıı merzimi aıaqtaldy - UEM

NUR-SULTAN. QazAqparat – Kommýnaldyq tarıfti kóterýge jarııalanǵan 180 kúndik moratorıı aıaqtalǵandyqtan, tarıf mólsherleri ózgerýi múmkin. Bul jaıynda Ulttyq ekonomıka birinshi vıtse-mınıstri Tımýr Jaqsylyqov Úkimet otyrysynda aıtty, dep habarlaıdy QazAqparat tilshisi.

«Prezıdent tapsyrmasyn iske asyrý úshin vedomstvo halyqqa kommýnaldyq qyzmet tarıfterin kóterýge 180 kúnge moratorıı engizdi. Osyǵan baılanysty 100-den astam tabıǵı monopolııa sýbektileriniń tarıfteri túzetilgen. Bul halyqqa 3,2 mlrd teńgeden astam qarajatty únemdeýge múmkindik berdi. Búgingi tańda moratorıı aıaqtaldy», - dedi Tımýr Jaqsylyqov.

Onyń málimeti boıynsha, ekinshi jartyjyldyqta tarıfter ózgerýi múmkin. Biraq, ol ınflıatsııa dáliziniń sheginen aspaýy kerek.

«Tutynýshylar men tabıǵı monopolııa sýbektileri múddeleriniń teńgerimin qamtamasyz etý, sondaı-aq kommýnaldyq qyzmetter tarıfteriniń kúrt ósýine jol bermeý maqsatynda kelesi sharalar qabyldanady:

- qarajattardyń maqsatty paıdalanylýyn baqylaý;

- turǵyn úı kómegi tetikterin damytý;

- ár aımaqtyń áleýmettik-ekonomıkalyq jaǵdaıyn eskere otyryp, jeke ádis kózdeý.

Jańa salyq-bıýdjet saıasaty sheńberinde bıýdjetaralyq qatynastardy reformalaý jáne merzimderi men kezeńderin eki ese qysqarta otyryp, bıýdjettik josparlaýdyń reınjınırıngi boıynsha jumys júrgizilip jatyr», - dedi Tımýr Jaqsylyqov.

Aıta ketsek, buǵan deıin vıtse-mınıstr QR Prezıdenti Qasym-Jomart Toqaevtyń Úkimettiń keńeıtilgen otyrysynda aıtqan synynan keıin «Samuryq-Qazyna» qorynyń mıssııasy qaıta qaralatynyn málim etti.