Kommýnaldyq tarıfter bıyl qalaı ózgerdi

NUR-SULTAN. QazAqparat – Tabıǵı monopolııalardy retteý komıtetiniń tóraǵasy Asan Darbaev Qazaqstanda bıyl kommýnaldyq qyzmetterdiń tarıfi 2019 jylǵa qaraǵanda qanshalyqty ózgergenin aıtyp berdi, dep habarlaıdy QazAqparat tilshisi.

«Memleket basshysynyń tapsyrmasy boıynsha 2020 jyldyń qańtarynda tarıfter ósip ketpes úshin 2019 jyly tyńǵylyqty jumys júrgizildi. Kommýnaldyq qyzmetterdiń ortasha josparly ósimi 15 paıyz dep boljanǵan edi», - dedi Asan Darbaev OKQ-da ótken baspasóz máslıhatynda.

Komıtet basshysynyń aıtýynsha, Prezıdent tapsyrmasyn oryndaý úshin 400-ge tarta kásiporynnyń jumysy taldanǵan.

«Bul rette óndiristik fýnktsııalarǵa qatysy joq jáne basym emes sharalar aıqyndaldy. Osy sharalardy iske asyra otyryp, tabıǵı monopolııa sýbektileriniń shyǵyn bóligi 16,4 mlrd teńgege deıin azaıtyldy. Odan bólek, tabıǵı monopolııa sýbektileriniń basym emes baǵyttary boıynsha taǵy 10,4 mlrd teńge ońtaılandyryldy. Osy sharalardyń arqasynda tarıfterdiń josparly ózgerisi 0,5 paıyzǵa ǵana ózgerdi (2020 jyldyń 1 qańtary men 2019 jyldyń 1 qańtaryn salystyrǵanda). Jylýmen, sýmen qamtý jáne sý tartý boıynsha tarıfter tómendedi», - deıdi Asan Darbaev.

Spıker elektrmen qamtý tarıfiniń ósýin stansalarda shekti tarıfterdiń 15 paıyzǵa qymbattaýymen baılanystyrady.