Kommýnaldyq saladaǵy 200 myń jumysshynyń aılyǵy 50 paıyz ósedi

ASTANA. QazAqparat – Amanat partııasy fraktsııasynyń halyq tabysyn arttyrý baǵdarlamasy talqylaǵan jıynynda Ulttyq ekonomıka mınıstri Álibek Qýantyrov kommýnaldyq sala qyzmetkerleriniń turaqsyzdyǵyn qalaı tejeýge bolatynyn aıtty, dep habarlaıdy QazAqparat tilshisi.

«2023 jyly 6 myń dárigerdiń ortasha jalaqysy jáne orta medıtsınalyq personaldyń ortasha jalaqysy, áleýmettik qamsyzdandyrý salasyndaǵy 38 myń qyzmetkerdiń ortasha jalaqysy ulǵaıtylatyn bolady.

Azamattyq qorǵanys organdary qyzmetkerleriniń jalaqysyn ortasha eseppen 20%-ǵa kezeń-kezeńimen arttyrý bastaldy.

Kommýnaldyq qyzmet jumyskerleriniń jalaqysyn óńirler boıynsha ortasha salalyq deńgeıge deıin orta eseppen 50%-ǵa jýyq arttyrý úshin quqyqtyq negizder qalyptastyryldy. Bul shara shamamen 200 myń qyzmetkerdiń tabysyn arttyrýǵa, sondaı-aq kadrlar turaqsyzydyǵyn azaıtýǵa múmkindik beredi», - dedi Álibek Qýantyrov.

Onyń aıtýynsha, tabysy kúnkóristiń eń tómengi deńgeıine de jetpeıtin qazaqstandyqtardyń úlesi 5,2% shamasynda.

«2022 jyldyń qorytyndysy boıynsha jumys kúshi 9,4 mln adam boldy. Jumyspen qamtylǵan halyq – 9 mln adam, jaldamaly qyzmetkerler – 6,8 mln adam, óz betinshe jumyspen qamtylǵandar – 2,1 mln adam. Onyń ishinde 1,6 mln adam jeke kásipker bolyp esepteledi.

2022 jyldyń qorytyndysy boıynsha jumys istep turǵan shaǵyn jáne orta kásipkerlik sýbektileriniń sany 27% ósip, 1,8 mıllıonnan asty. Osy sektorda jumyspen qamtylǵandardyń sany 18,3% artyp, 4,1 mıllıonǵa jetti.

Ekonomıkadaǵy shaǵyn jáne orta bıznes úlesi 33,3%-dan 36,5%-ǵa deıin ósti. Tabysy eń tómengi kúnkóris deńgeıinen tómen halyqtyń úlesi 5,2% boldy. Jumyssyzdyq deńgeıi 4,9% bolyp tirkeldi», - dedi vedomstvo basshysy.