Kommýnaldyq mekeme qyzmetkerin kóligimen qaǵyp ótken júrgizýshi qamaýǵa alyndy
Maqtaaral aýdandyq polıtsııa bólimine aýrýhanadan dene jaraqaty bar er adam jetkizilgeni týraly habarlama túsedi. Oqıǵa ornyna jedel-tergeý toby shyqty.
«Anyqtalǵandaı, 13 mamyr kúni saǵat 21:30 shamasynda Myrzakenttegi ortalyq alańda eki turǵyn arasynda janjal bolyp, sońy tóbeleske ulasqan. Nátıjesinde olardyń biri óziniń «Mercedes-Benz» kóligimen ekinshisin soqqan. Qazirgi tańda QR QK-niń 106-baby 2-bóligi «Densaýlyqqa qasaqana aýyr zııan keltirý» men QR QK-niń 293-bóligi «Buzaqylyq» boıynsha sotqa deıingi tergeý bastaldy. Qasaqana shabýyl jasaǵan kúdikti qamaýǵa alyndy. Sonymen qatar, oqıǵa ornynda bolǵan aýdandyq máslıhattyń depýtaty janjaldasýshylardy ajyratýǵa tyrysqany anyqtaldy. Tergeý barysy Túrkistan oblysy PD bastyǵynyń baqylaýynda», - delingen polıtsııa bólimi taratqan aqparatta.
Eske salsaq, buǵan deıin osy oqıǵa boıynsha aýdan ákimdigi aqparat bergen bolatyn.
«Ortalyq alańda dop oınap júrgen aýyl turǵyny kógaldandyrylǵan aımaqtaǵy gúl kóshetterine zııan keltirgen. Atalǵan azamat birneshe ret jasalǵan eskertýge kóńil bólmegen. «Myrzakent qyzmet» MKK dırektory ári aýdandyq máslıhattyń depýtaty Tımýr Adambekov jáne «Myrzakent qyzmet» MKK qyzmetkeri Tahır Jýsýpbaev oqıǵa ornynda turǵynǵa túsindirý jumysyn júrgizgen. Sol sátte balaǵat sózder aıtylyp, janjal bastalady. Tipti, bir-birine qol jumsap ta jiberedi. Ashýǵa berilgen aýyl turǵyny ruqsat etilmegen ortalyq alańǵa kirip, qasaqana memlekettik kommýnaldyq kásiporyn qyzmetkerlerin 3 ret kóligimen qaqqan. Qazirgi tańda T. Jýsýpbaevqa Myrzakent ortalyq aýrýhanasynyń hırýrgııa bóliminde ota jasalyp jatyr», - dep málim etilgen edi.