Kommýnaldyq qyzmettiń qaı túrine ótemaqy beriledi

ALMATY. QazAqparat – Almatyda ótken onlaın brıfıng barysynda qalalyq energetıkalyq tıimdilik jáne ınfraqurylymdyq damý basqarmasynyń basshysy Áset Masabaev kommýnaldyq qyzmetterdiń qaı túrine ótemaqy jasalatynyn aıtty, dep habarlaıdy QazAqparat tilshisi.

Onyń aıtýynsha, QR Prezıdenti janyndaǵy Tótenshe jaǵdaıdy qamtamasyz etý jónindegi memlekettik komıssııanyń sheshimine sáıkes, Indýstrııa mınıstrligi kommýnaldyq qyzmet kórsetýshilerge shyǵyndy óteý erejesin bekitken.

Sol erejege sáıkes, ótinish bildirgen tulǵalar jeke derbes shot ıesi bolýy shart.

Turǵynnyń áleýmettik mártebesi rastalǵan jaǵdaıda energetıkalyq tıimdilik basqarmasy aqshany «Alseko» AQ usynǵan derekterge sáıkes jetkizýshilerdiń esep aıyrysý shotyna aýdarady. Al olar óz kezeginde esepti kommýnaldyq qyzmetterdiń kólemine proportsıonaldy túrde júrgizedi.

«Budan bólek, tutynýshy kommýnaldyq qyzmetterdi tólegen jaǵdaıda, sondaı-aq kommýnaldyq qyzmetterdi tóleý týraly túbirtekte 15 myń teńgeden kem soma bolsa, kommýnaldyq qyzmetti jetkizýshiler tólemdi kelesi aıǵa qaıta esepteıdi. Kómek joǵaryda atalǵan sanattarǵa jatatyn, óz atyna kommýnaldyq qyzmet kórsetýshimen jasalǵan kelisimsharty bar jáne karantın engizilgen eldi mekende turatyn adamdarǵa kórsetiledi. Turǵyn úı týraly zańynyń 2-babyna sáıkes kommýnaldyq tólemder – sý, jylý, gaz, elektr energııasy, qoqys shyǵarý jáne lıft úshin tólenedi. Basqa qyzmetterge ótemaqy jasalmaıdy», - dedi Áset Masabaev.

Munyń aldynda mundaı ótemaqyny áleýmettik turǵydan az qamtylǵan 60 myńnan asa almatylyq alatynyn jazǵan bolatynbyz.