Kommýnaldyq qyzmetter úshin ótemaqyny 200 myńǵa jýyq shymkenttik alady

ShYMKENT. QazAqparat – Shymkentte 200 myńǵa jýyq turǵynnyń kommýnaldyq qyzmetter tólemine ótemaqy beriledi. Bul týraly qala ákiminiń orynbasary Maqsut Isahov málimdedi, dep habarlaıdy QazAqparat tilshisi.

Maqsut Isahovtyń aıtýynsha, kommýnaldyq shyǵyny úshin 15 myń teńge alatyndardyń qatarynda áleýmettik az qamtylǵandar, kópbalaly analar, jalǵyzbasty zeınetkerler t.b. sanattaǵy azamattar bar.

«Bul másele boıynsha qalalyq jumyspen qamtý jáne áleýmettik qorǵaý basqarmasy abonentterdiń tizimin jasap, jınaqtaý ústinde. Turǵynnyń áleýmettik mártebesi rastalǵan jaǵdaıda kommýnaldyq qyzmetter tutynýshylarynyń derbes shottaryna tıisti qarjy aýdarylady, - dedi qala ákiminiń orynbasary.

Aıta ketsek, memlekettik organdardyń usynysy negizinde kommýnaldyq shyǵyny úshin tólem alýshylardyń qatarynda múgedekter, múgedek balalardy tárbıelep otyrǵan otbasylar, kópbalaly januıalar, soǵys ardagerleri jáne olarǵa teńestirilgen tulǵalar, memlekettik nemese qoǵamdyq mindetterin, áskerı qyzmetin oryndaý barysynda qaza tapqan tulǵalardyń otbasylary, tómen jáne odan az zeınetaqy alatyn jáne ataýly áleýmettik kómek alatyn azamattar, onyń ishinde jalǵyzbasty zeınetkerler bar.