Kommýnaldyq qyzmet túbirteginde tarıfterdiń qanshalyqty arzandaǵany kórsetiledi
Túbirtekte tarıfterdiń qanshalyqty arzandaǵany týraly málimetter kórsetiledi. 2019 jyldyń 1 qańtarynan bastap kommýnaldyq tarıfter orta eseppen 10 protsentke arzandaǵan bolatyn.
«Tómendetilgen tarıfter boıynsha túbirtekter Astana turǵyndaryna kúni erteń jetkiziledi. Ákimdikpen jáne tabıǵı monopolııalar sýbektilerimen birlese júrgizilgen jumystar nátıjesinde túbirtekke kommýnaldyq qyzmet tarıfteriniń qanshalyqty arzandaǵany týraly qosymsha málimetterdi qosýdy uıǵardyq», - dedi QR UEM Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń Astana qalasy boıynsha departamentiniń basshysy Bolat Tanabergenov ákimdikte ótken baspasóz qyzmetinde.
Ázirge jańa tarıftermen eseptelgen qorytyndylar turǵyndar úshin elektrondy formatta qoljetimdi.
«Máselen sýmen jabdyqtaý tarıfi qosysha qun salyǵyn eseptegende, tekshe metrine 46,21 teńge bolatyn, jańa tarıfte bul baǵa - 41,59 teńge. Shamamen 10% arzandaǵan. Sý tartý boıynsha tarıf tekshe metr úshin 39,08 teńgeden 35,17 teńgege tómendedi», - dep túsindirdi ol.
Eske sala ketsek, 2018 jyldyń qarashasynda Memleket basshysy Nursultan Nazarbaev Aqordada Qaýipsizdik keńesiniń otyrysynda kommýnaldyq qyzmetterge tarıfterdi zańsyz ósirgen tabıǵı monopolııalar sýbektilerin jazalaýdy talap etti. Sonymen qatar, Prezıdent Qazaqstanda elektr energııasy qunyn tómendetýdi tapsyrdy.